Xelq'ara kechürüm teshkilati naxsha tékisti yazghuchisi yashar shöhretni qoyup bérishni telep qildi
2024.11.28
Xelq'ara kechürüm teshkilati 27-noyabir küni öz tor bétide axbarat élan qilip, 2024-yil 6-ayda türmige qamalghan muzikant we naxsha tékisti yazghuchisi yashar shöhretning salametlik ehwalidin endishe qiliwatqanliqini bildürgen.
Axbaratta déyilishiche, bu yil 26 yashqa kirgen yashar shöhret, 2022-yil 27-noyabir küni “Aq qeghez inqilabi” gha qatnashti dégen guman bilen tutulup, 21 kün tutup turulghandin kéyin qoyup bérilgen. U 2023-yil 11-ayda tutqun qilinishtin ilgiri sichüenning chéngdu shehiride yashap kelgen, torda Uyghurche shé'irlarni, naxsha tékistlirini élan qilghan, köpligen Uyghurche kitablarni, bolupmu Uyghur tarixi we kilassik edebiyatigha a'it eserlerni saqlighan. 2024-Yil 6-ayning 20-küni xitay hökümiti yashargha “Diniy esebiylikni terghib qilish”, “Diniy esebiylikke da'ir qanunsiz matériyallarni saqlash” dégen jinayetlerni artip 3 yilliq késiwetken. Bular xitayning öz medeniyitini saqlap qélishqa tirishqan Uyghurlarni nedila bolsa qattiq basturuwatqanliqini körsitidiken.
Bu axbarat bilen birlikte yashar shöhret ishligen rep naxshisi tékisti bérilgen bolup, uningda “Ayrildim eng axirqi insan sézimidin, izdeyttim teselli égilmes boynum we tizimdin” dégen qurlar orun alghan.
Xelq'ara kechürüm teshkilati yashar shöhretning tutulup qamaqqa élin'ghan mezgilide salametlik ehwalining nacharliship ketkenlikini, éghir derijide kanay yallughi késilige giriptar bolup, qerellik dora ichishke mejbur bolghanliqini eskertip, xitay hökümitidin uning salametlikini nezerde tutup qoyup bérishini telep qilghan.