Xitayning Uyghur élining jenubida yataqliq mekteplerni köpeytishi diqqet qozghidi

Xitay hökümiti Uyghur élining jenubidiki yézilarda bashlan'ghuch mektep yéshigha toshqan balilarni yataqliq mekteplerde terbiyelesh xizmitini kücheytidiken.

Shinxu'a torining bu heqtiki xewiridin melum bolushiche, xitay merkizi hökümiti we Uyghur aptonom rayonluq hökümetning qollishi bilen Uyghur élining jenubidiki qeshqer, xoten, atush we aqsuni asas qilghan jaylarda mektep yéshigha toshqan balilarni yataqliq mekteplerde oqutush xizmiti jiddiy dawam qilmaqtiken.

Xewerde bundaq yataqliq mektepler arqiliq namrat yézilarda mektep yétishmeslik we balilarning mekteplerge bérishtiki qatnash qolaysizliqlirining hel qilin'ghanliqi dawrang qilin'ghan. Biraq chet'ellerdiki közetküchiler buning ata-aniliri lagérgha élip kétilgendin kéyin yighiwélin'ghan balilarni orunlashturush xizmiti bilen munasiwetlik ikenlikini mölcherlimekte.

Xitay da'iriliri Uyghur élida 2 milyon'ghiche bolghan Uyghurni lagérgha tutqun qilghandin kéyin ularning qaranchuqsiz qalghan balilirinimu atalmish “Perishtiler mektipi” dégendek chirayliq isimlar bilen yétimxanilargha yighiwalghan idi. Yuqiriqi xewerde jenubtiki 3 wilayet bir oblasttiki yataqliq mekteplerde yétip oquwatqan balilarning sani heqqide héchqandaq melumat bérilmigen, emma aldimizdiki yillarda jenubtiki 22 namrat yézini asas qilip turup, bu xizmetning dawamliq kücheytilidighanliqi bayan qilin'ghan. Xewerde diqqet qozghaydighan yene bir nuqta shuki, ötken 3 yil mabeynide mushu xil mekteplerge oqutquchi toluqlash üchün Uyghur élige 80 ming neper oqutquchi xadimi qobul qilin'ghan. Ularning 66 pirsenti jenubtiki mekteplerge orunlashturulghan iken.

Qaranchuqsiz qalghan we mushundaq yighiwélish orunlirida xitay oqutquchilar teripidin pütünley xitay medeniyiti asasida terbiyeliniwatqan Uyghur balilirining ehwali küchlük endishe peyda qilmaqta. Awstraliye latrobi uniwérsitétining proféssori jeymis léybold xitay da'iriliri Uyghur diyarida qurghan daril'étamlar toghrisidiki bir maqaliside xitay hökümitining Uyghur balilirini mushundaq ismi özgergen daril'étamlargha yighiwélish arqiliq yash bir ewlad Uyghurlarni özining medeniyet we kimlik yiltizidin qomurup tashlimaqchi boluwatqanliqini bildürgen idi.