Хитайниң уйғур елиниң җәнубида ятақлиқ мәктәпләрни көпәйтиши диққәт қозғиди

Мухбиримиз ирадә
2019.04.04
Share on WhatsApp
Share on WhatsApp

Хитай һөкүмити уйғур елиниң җәнубидики йезиларда башланғуч мәктәп йешиға тошқан балиларни ятақлиқ мәктәпләрдә тәрбийәләш хизмитини күчәйтидикән.

Шинхуа ториниң бу һәқтики хәвиридин мәлум болушичә, хитай мәркизи һөкүмити вә уйғур аптоном районлуқ һөкүмәтниң қоллиши билән уйғур елиниң җәнубидики қәшқәр, хотән, атуш вә ақсуни асас қилған җайларда мәктәп йешиға тошқан балиларни ятақлиқ мәктәпләрдә оқутуш хизмити җиддий давам қилмақтикән.

Хәвәрдә бундақ ятақлиқ мәктәпләр арқилиқ намрат йезиларда мәктәп йетишмәслик вә балиларниң мәктәпләргә бериштики қатнаш қолайсизлиқлириниң һәл қилинғанлиқи давраң қилинған. Бирақ чәтәлләрдики көзәткүчиләр буниң ата-анилири лагерға елип кетилгәндин кейин йиғивелинған балиларни орунлаштуруш хизмити билән мунасивәтлик икәнликини мөлчәрлимәктә.

Хитай даирилири уйғур елида 2 милйонғичә болған уйғурни лагерға тутқун қилғандин кейин уларниң қаранчуқсиз қалған балилириниму аталмиш “пәриштиләр мәктипи” дегәндәк чирайлиқ исимлар билән йетимханиларға йиғивалған иди. юқириқи хәвәрдә җәнубтики 3 вилайәт бир областтики ятақлиқ мәктәпләрдә йетип оқуватқан балиларниң сани һәққидә һечқандақ мәлумат берилмигән, әмма алдимиздики йилларда җәнубтики 22 намрат йезини асас қилип туруп, бу хизмәтниң давамлиқ күчәйтилидиғанлиқи баян қилинған. Хәвәрдә диққәт қозғайдиған йәнә бир нуқта шуки, өткән 3 йил мабәйнидә мушу хил мәктәпләргә оқутқучи толуқлаш үчүн уйғур елигә 80 миң нәпәр оқутқучи хадими қобул қилинған. Уларниң 66 пирсәнти җәнубтики мәктәпләргә орунлаштурулған икән.

Қаранчуқсиз қалған вә мушундақ йиғивелиш орунлирида хитай оқутқучилар тәрипидин пүтүнләй хитай мәдәнийити асасида тәрбийәлиниватқан уйғур балилириниң әһвали күчлүк әндишә пәйда қилмақта. Австралийә латроби университетиниң профессори җәймис лейболд хитай даирилири уйғур диярида қурған дарилетамлар тоғрисидики бир мақалисидә хитай һөкүмитиниң уйғур балилирини мушундақ исми өзгәргән дарилетамларға йиғивелиш арқилиқ яш бир әвлад уйғурларни өзиниң мәдәнийәт вә кимлик йилтизидин қомуруп ташлимақчи болуватқанлиқини билдүргән иди.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.