Moskwa, astana we minsk yawro-asiya iqtisadiy ittipaqi kélishimini testiqlashni qarar qildi

• Muxbirimiz ümidwar
  2014-07-09

Rusiye, qazaqistan we bélarusiye parlaméntlirining rehberliri yawro-asiya iqtisadiy ittipaqi kélishimini oxshash halda testiqlashni qarar qildi. Qazaqistan xewerler agéntliqining uchuridin melum bolushiche, rusiye fédératsiye kéngishining mes'uli waléntin matwiyénko bu heqte resmiy melumat bergen bolup, u: “Biz bu döletler parlaméntlirining rehberliri bilen kélishimni oxshash halda testiqlash heqqide pütüshtuq” dep tekitligen.

Melum bolushiche, rusiye, qazaqistan we bélarusiye rehberliri bu yil 29-may küni qazaqistan paytexti astana shehiride yawro-asiya iqtisadiy ittipaqini qurush heqqidiki kélishimge qol qoyghan bolup, mezkur kélishim 2015-yili, 1-yanwardin bashlap küchke ige iken.

Kawkaziyediki erméniye mezkur ittipaqqa eza bolush aldida turmaqta. Shundaq bolghanda yawro-asiya iqtisadiy ittipaqi sabiq sowét ittipaqi zéminidiki 170 milyon nopusqa we zor iqtisadiy küchke ige ittipaqqa aylinidiken.

Rusiye prézidénti wladimir putin ilgiri yawro-asiya ittipaqini qurushni teshebbus qilghan bolup, bu qétim qurulghan yawro-asiya iqtisadiy ittipaqi belki putinning mezkur ghayisige asas bolushi mumkin iken.

Nöwette, yawro-asiya iqtisadiy ittipaqigha qirghizistanningmu qiziqiwatqanliqi melum. Emma, özbékistan bolsa özini chetke élish pozitsiyisi, türkmenistan bolsa, bitereplik siyasiti qollanmaqta.