3-Nöwetlik yawro-asiya yermenkisi aldida “Térrorluqqa qarshi turush” herbiy meshiqi ötküzüldi

Ürümchide échilidighan 3-nöwetlik yawro-asiya yermenkisi échilish aldida ürümchi shehiride bixeterlik we nazaret qilish xizmetliri kücheytilgen.

Xitayda chiqidighan seyshin xewerler torining xewiridin qarighanda, ürümchide turushluq alahide saqchi qisimliri yene yermenke mezgilidiki bixeterlikke kapaletlik qilish üchün mexsus “Térrorluqqa qarshi turush” herbiy meshiqi ötküzgen.

Ürümchi yawro-asiya yermenkisi 2011-yili ötküzülüshke bashlan'ghandin buyan, da'iriler her yili oxshash mezgilde ürümchi shehirining kirip-chiqish éghizlirigha qaritilghan tekshürüsh we charlashni kücheytip kelmekte. Da'iriler hetta 2012-yili yawro asiya yermenkisi harpisida, yermenkining bixeterlikige tehdit dep qaralghan kishilerni ürümchidin heydigen. Eyni chaghda radi'omiz igiligen uchurlarda ürümchi sheherlik saqchi idarisining yermenkige tehdit dep qaralghan kishiler üstidin mexsus qara tizimlik turghuzup, bu kishilerni yurtigha mejburiy qoghlighanliqi, bu kishilerning asasen köchme nopusluq Uyghurlar ichidiki saqal qoyghan erler, chümbel artqan ayallar shundaqla yene sezgür mesililer üstidin dawa qiliwatqan erzdarlar ikenliki melum bolghan idi.

Uyghur éli da'irilirining her yili yawro-asiya yermenkisi mezgilidiki mislisiz qattiq bixeterlik tedbirliri yermenkige barghan chet'ellik ziyaretchiler we muxbirlarning alahide diqqitini qozghighan. Közetküchiler bolsa, bu yil Uyghur élide arqa-arqidin meydan'gha kéliwatqan weqeler sewebidin da'irilerning yermenke bixeterlikige kapaletlik qilish nami astida yenimu qattiq tazilash, zerbe bérish heriketlirini élip baridighanliqini agahlandurmaqta.