Yawru-asiya körgezmiside milliy alahidilikning gewdilenmigenliki torda munazire qozghidi

Ürümchide ötküzülgen xitayning 3 ‏-nöwetlik yawro-asiya körgezmiside Uyghur rayonining milliy alahidilikining ipadilenmigenliki torda munazire qozghidi.

Erk isimlik bir tordash “Bu körgezmide eng eqelliysi Uyghurche yéziqmu yoq, körgezme bashtin ‏-axiri ichkiri ölkilerdiki körgezmilerdin perqsiz, bu jayning Uyghur aptonom rayoni ikenliki tamamen untulghan” dep yazghan. Buninggha qarshi yene bir xitay tor ezasi, körgezmige kirish ishikide ikki xil til yéziqning barliqini tilgha élip, hemme ishni milliy mesilige taqiwalmasliq heqqide shikayet qilghan. Bu shikayet Uyghur tor ezaliri teripidin keng kölemde tenqidke uchrighan.

Bu témida Uyghurlarni qollap inkas yazghan bir xitay sen'etkar, Uyghurlarning bu heqtiki naraziliqining toghriliqini tilgha élip “Bu yerde milletchilik qiliniwatqan ish yoq, telep qiliniwatqini insap we adalet” dep yazghan.

Uyghur til-yéziqining chetke qéqilishi Uyghur rayonida naraziliq qozghawatqan minglarche mesililerdin biridur. Uyghur aptonom rayonining merkizide ötküzülgen bir xelq'araliq körgezmide, rayonning milliy alahidilikining eks etmesliki, bu qétimqi bes-munazirining asasliq diqqet nuqtisi bolghan.