Yawropa ittipaqi xitay shirketlirini rusiyege yardem bergenliki üchün jazalashni pilan qilghan

Yawropa ittipaqi ukra'inadiki urushning 2 yilgha yéqinlishishigha egiship, xitay we bashqa döletlerning shirketlirige tunji qétim jaza bérishni otturigha qoyghan.

Amérikaning “Siyaset” (politicho) zhurnilining 2024-yili 2-ayning 13-kündiki mexsus xewirige asaslan'ghanda, yawropa ittipaqi tunji qétim xitay, türkiye, hindistan we sérbiye qatarliq döletlerning shirketlirini jazalashni pilanlighan.

Mezkur maqalide déyilishiche, yawropa ittipaqi xitay re'isi shi jinping bilen rusiye prézidénti wiladimir putin mezkur ikki diktatora tüzüm otturisidiki “Cheksiz dostluq” ni jakarlighandin buyan, xitayning rusiyening ukra'inagha tajawuz qilishigha qandaq yardem qiliwatqanliqi toghrisidiki uchurlarni yighishqa bashlighan.

Yawropa ittipaqi, teklip layihesige asasen rusiyege yardem bériwatidu dep qarilidighan töt xitay shirkitini jazalashqa teyyarliq qilmaqtiken. Buningda yawropa shirketlirining bu xitay shirketliri bilen alaqe qilishi cheklinidiken.

Kiyéw iqtisad institutigha munasiwetlik aqillar ambirining tetqiqatida otturigha qoyulushiche, hazir xitay we xongkongdiki shirketler gherbning jazasigha uchraydighan “Jeng meydani téxnikisi” ni toshushtiki eng muhim wasitichi iken.

Bu yéngi teklipke asasen, yawropa ittipaqidiki 27 hökümet mezkur jaza pilanigha qoshulsa, yawropa ittipaqi tunji qétim xitay shirketlirini ochuq-ashkara jazaliyalaydiken.