Явропа иттипақиниң дипломатлири хитайниң лагерлар һәққидики тәшвиқатлириға янтаяқ болуп қелиштин еһтият қилмақта


2019-11-14
Share

Хитай һөкүмити явропа иттипақидики дипломатларни узундин буян уйғур елини зиярәт қилишқа тәклип қилип келиватқан иди. Бирақ ройтерс агентлиқиниң явропа иттипақидики бир қисим дипломатлардин игилишичә, хитайниң бу тәлипиниң ишқа ашмаслиқ еһтималлиқи юқири икән. Чүнки бу дипломатлар хитай һөкүмитиниң зиярәтни өзиниң лагерлар һәққидики тәшвиқати үчүн қоллинишидин әнсирәйдикән.

Хитай һөкүмити әслидә явропа иттипақи дипломатлирини бу йил 3-айда уйғур елидә зиярәттә болушқа дәвәт қилған. Бирақ хитай бу дипломатларниң уйғур елигә барған тәқдирдә уйғур аптоном районлуқ парткомниң секретари чен чүәнго қатарлиқ юқири дәриҗилик әмәлдарлар билән көрүшүш вә шундақла кишилик һоқуқ мәсилисини муназирә қилиштәк тәлипини рәт қилғанлиқтин дипломатлар бу зиярәткә бармайдиған болған.

Хәвәрдә ейтилишичә, йеқинда бундақ тәклип қайтидин оттуриға чиққан болуп, икки тәрәп арисида йәнә музакириләр башлиған. Бирақ исмини ашкарилашни халимайдиған 6 нәпәр явропа иттипақи дипломати ройтерс агентлиқиға қилған сөзидә өзлириниң бу зиярәтни әмәлийлишиду дәп қаримайдиғанлиқини, чүнки хитай һөкүмитиниң өзлиригә чәклимисиз һалда зиярәт қилиш пурсити бәрмигәнни аз дәп, бу зиярәтни "уйғур елидә һәммә иш нормал" дәйдиған тәшвиқатини қилиш үчүн қоллинидиғанлиқини билдүргән.

Дипломатлардин бири "бизниң бу зиярәттә еришидиғинимизниң тайини йоқ. Хитай уни пәқәтла тәшвиқат мәқсити үчүн қоллиниду" дегән. Йәнә бир дипломатму ройтерс агентлиқиниң мухбириға "хитай һөкүмитиниң бизниң у йәрдики зияритимизни ‹ғәрблик дипломатлар бизниң шинҗаңдики сиясәтлиримизни қоллайду' дәп тәшвиқ қилиш еһтималлиқи бизни ойландурмақта," дегән.

Дәрвәқә, хитай һөкүмитиниң уйғур елидә 2 милйон әтрапида уйғур, қазақ қатарлиқ йәрлик милләтләрни "йепиқ тәрбийә" лагерлириға қамап, уларни роһий вә җисманий җәһәттин қейин-қистаққа еливатқанлиқи кәң ашкариланғандин кейин хитай һөкүмити пакистан, афғанистан, һиндонезийә, малайсия қатарлиқ бир қатар дөләтләрниң дипломатлири вә мухбирлирини уйғур елида алдин орунлаштурулған зиярәтләргә апирип, уларниң ағзи арқилиқ өзини ақлаш үчүн паал һәрикәт қилған. Бирақ лагерларға аит күчлүк пакитлар алдида уларниң бу тәшвиқатлири узун пут тирәп туралмиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт