Yawropa ittipaqi xitaydin kélidighan muhim minéral maddilargha bolghan tayinishchanliqni azaytish üchün qanun maqullidi

Yawropa ittipaqi litiy, nikél qatarliq muhim minéral maddilarning dölet ichidiki teminlesh menbesi we nishani toghrisida kélishim hasil qilip bu heqte qanun maqullighan. Bu qanun arqiliq asasliqi yawropa ittipaqi xitaydin kélidighan muhim matériyallargha bolghan tayinishchanliqi azaytidiken. Litiy, nikél qatarliq muhim minéral maddilarning köpinchisi, Uyghur élidin kélidighanliqi melum.

“Yawropa parlaménti tori” ning 2023-yili 12-ayning 12-kündiki mexsus xewirige asaslan'ghanda, köp sandiki parlamént ezalirining qollishi bilen maqullan'ghan “Halqiliq xam matériyal qanuni” yawropaning igilik hoquqi we riqabet küchige ige bolushni meqset qilidiken.

Mezkur xewerde mundaq déyilgen: “Litiy, nikél qatarliq muhim minéral maddilar éléktrlik aptomobil, küntaxta we eqliy iqtidarliq téléfon yasashta ishlitidighan muhim xam eshya. Bu halqiliq xam eshya yawropa ittipaqi üchün istratégiyelik ehmiyetke ige. Rusiyening ukra'inagha qarshi urushi we künséri keskinlishiwatqan xitayning soda-sana'et siyasiti tüpeyli litiy, nikél qatarliq xam eshyalarmu jughrapiyelik we siyasiy mesilige aylandi”.

Roytérs agéntliqining ashkarilishiche, “Uyghur mejburiy emgikining aldini élish qanuni” boyiche, amérika chégra qoghdash we tamozhna da'irilirining Uyghur rayonida ishlepchiqirilghan mehsulatlargha qaratqan tekshürüsh nishani küntaxta, litiy i'onluq bataréye, aptomobil kamiri we aptomobillarning asasliq matériyali bolghan alyumin, polat qatarliq mehsulatlarghimu qaritilmaqta iken.

Gérmaniyediki brénrütér tetqiqat ornining qurghuchisi we ijra'iye diréktori jonatan brénrütérning éytishiche, Uyghur mejburiy emgikining aldini élishning eng ünümlük charisi ishlepchiqirish bazisini xitaydin bashqa jaygha yötkesh iken.

Jonatan brénrütér éytqandek, yawropa ittipaqining xitaydin kélidighan muhim matériyallargha bolghan tayinishchanliqini azaytish üchün qanun maqullishi Uyghur mejburiy emgikige taqabil turushtiki ünümlük chare dep qaralmaqta. Shuning bilen bir waqitta bu qanun yawropa ittipaqining litiy, nikél qatarliq istratégiyelik xam eshyalarni import qilishta xitaygha tayinip qélishning aldini alidiken.