Yawropa parlamént ezaliri yawropa hökümetlirini tik-tokni chekleshke chaqirghan

 Yawropa parlaménti ezaliri yawropa hökümetlirining xitay ijtima'iy alaqe supisi tik-tokni cheklesh waqti kelgenlikini, hökümet xadimlirining mezkur xitay ijtima'iy alaqe supisini ishlitishini chekleshke chaqirghan.

“Politiko” gézitining xewer qilishiche, yawropa parlaménti ötken hepte chet el hökümetlirining saxta uchur, tor hujumi we halqiliq ul eslihelirige kashila qilish arqiliq yawropa döletlirining ichkiy ishlirigha arilishish heriketlirini tosushqa a'it bir tewsiye qarari maqullighan. Yawropa parlamént ezaliri bu tewsiye qararida yawropa hökümetlirining tik-tokqa cheklime qoyghan bezi gherb döletliri bilen birdeklikni saqlashni telep qilghan.

Xitayning dunyadiki yash-ösmürler arisida keng omumlashqan tik-tok namliq ijtima'iy alaqe supisi, gherb xewpsizlik organliri teripidin jasusluq qilish, kishilerning shexsiy sanliq melumatlirini toplash, yash-ösmürlerning idiyesini zeherlesh bilen eyiblinip kélinmekte idi. “Politiko” gézitining bildürüshiche, tik-tok yawropa parlamént ezaliri teripidin cheklesh telep qilin'ghan birdin-bir ijtima'iy alaqe supisi emes.

Yawropa parlamént ezaliri yene yawropa kéngishi we yawropa komissiyonidin xitayning xu'awéy, ZTE  we rusiyening kaspérskiy, Ntech  laboratoriyesi namliq shirketlirinimu chekleshni telep qilghan. Yawropa parlaménti ezalirining qarari  amérika kéngesh palata ezasi marku rubiyo ötken hepte amérika edliye ministirliqidin tik-tokning ijra'iye diréktori jaw shawzéni tekshürüshni telep qilghan bir waqitta maqullan'ghan.

Marku rubiyo, tik-tokning dawamliq xitayda sanliq melumat toplawatqanliqi, jaw shawzéning bu yil 3-ayda amérika dölet mejliside guwahliq bergende yalghan sözligenlikini bildürgen. U amérika edliye ministirliqidin jaw shawzéning “Yalghanchiliq jinayiti” sadir qilghan-qilmighanliqini tekshürüshni telep qilghan. Jaw shawzé eyni waqitta tik-tokning sanliq melumatigha xitayda turup érishkili bolmaydighanliqini ilgiri sürgen idi.