Yawropa komissiyesi: “Yawropa parlaméntining Uyghurlar heqqidiki chaqiriqigha muwapiq rewishte étibar bérimiz”

Yawropa komissiyesi bayanatchisi 20-mart küni yawropa parlaméntining ötken hepte maqullighan, taylandning 27-féwral 40 Uyghurni xitaygha qayturushigha da'ir qarar layihesige inkas bildürüp, qarar layihesige diqqet qilghanliqi we uninggha muwapiq rewishte étibar béridighanliqini bildürgen. Yawropa komissiyesi bayanatchisining 20-mart muxbirimizgha yazma bayanati, taylandning mu'awin bash ministiri wéchayachay we edliye ministiri sodsong bashchiliqidiki tayland wekiller ömikining qeshqerge bérip, 27-féwral küni tayland da'iriliri teripidin xitaygha qayturup bérilgen 40 Uyghurning ehwalini igilimekchi boluwatqan peytte élan qilin'ghan. Bayanatta mundaq déyilgen: “Biz yawropa parlaméntining taylandtiki démokratiye we kishilik hoquq qarar layihesige diqqet qilimiz hem uninggha muwapiq rewishte étibar bérimiz. Yawropa komissiyesi tayland hökümitining 40 Uyghur musapirini xitaygha qayturushidin qattiq epsuslinidu. Bu qaytmasliq pirinsipigha xilapla bolupla qalmay, taylandning dölet we xelq'ara qanundiki mejburiyitige xilapliq qilishtur.”

Bayanatta yene yawropa komissiyesining tayland tashqi ishlar ministirliqigha bu mesilidiki jiddiy endishilirini biwasite bildürgenliki we tayland da'iriliri bilen bu toghriliq yene dawamliq sözlishidighanliqini éytqan. Bayanatta yene mundaq déyilgen: “Yawropa ittipaqi tayland da'iriliri bilen bolghan siyasiy diyalogda, jümlidin kishilik hoquq kéngishini öz ichige alghan köp tereplik munberlerde, kishilik hoquq mesilisini dawamliq otturigha qoyidu.”

 Yawropa parlaménti ötken hepte mutleq köp awazning qollishida maqullighan qarar layiheside, yawropa komissiyesining tayland bilen bolghan erkin soda söhbitidin paydilinip, uninggha taylandta qélip qalghan 8 Uyghurning xitaygha qayturulushini tosush heqqide bésim ishlitishini telep qilghan. Shu munasiwet bilen muxbirimiz bu heptining bashlirida yawropa komissiyege xet yézip, ulardin yawropa parlaméntining qarar layihesige bolghan inkasini sorighan. Halbuki, yawropa komissiyesi 20-mart muxbirimizgha qayturghan yazma bayanatida, yawropa parlaméntining qarar layihesini “Muwapiq rewishte étibargha alidighanliqi” ni qeyt qilghan bolsimu, lékin konkrét qandaq qilidighanliqini tilgha almighan.