Явропа иттипақи хитай билән түзгән мәбләғ селиш келишимини тәстиқлашни тохтатқан

Мухбиримиз җәвлан
2021-05-04
Share

Явропа иттипақиниң юқири дәриҗилик бир әмәлдариниң бүгүн билдүрүшичә, явропа иттипақи билән хитайниң дипломатик мунасивәтлириниң яманлишип кетиши түпәйлидин, явропа иттипақи хитай билән түзгән ғайәт зор соммилиқ мәбләғ селиш келишимини тәстиқлашни тохтатқан.

Явропа иттипақиниң муавин иҗраийә рәиси валдис домбровиски франсийә агентлиқиниң зияритини қобул қилғанда мундақ дегән: "мәлум мәнидин ейтқанда, биз явропа иттипақи тәрәптин елип баридиған барлиқ сиясий тәшвиқат һәрикәтлиримизни тохтаттуқ. Наһайити рошәнки, явропа иттипақиниң хитайға йүргүзгән җазаси вә хитайниңму явропа парламент әзалириға қайтурма зәрбә бериши бу келишимниң тәстиқлинишиға пайдисиз болди. Бу келишимниң тәстиқлиниши әмәлийәттә явропа иттипақи билән хитайниң мунасивәтлириниң қандақ тәрәққий қилишиға бағлиқ". Латвийәниң сабиқ баш министери болған валдис домбровиски явропа иттипақиниң бу келишимни тәстиқлаш ишлириға мәсул икән.

Өткән йил 12-айниң ахирида явропа иттипақи билән хитай 7 йиллиқ сөһбәттин кейин ахир ғайәт зор соммилиқ мәбләғ селиш келишими түзгән болуп, явропа иттипақидики 27 дөләт вә явропа парламентиниң уни тәстиқлиши керәк иди. Әмма бу келишим явропа иттипақидики бәзи дөләтләрниң қаршилиқиға учриған.

Бу йил 3-айда явропа иттипақи 4 нәпәр хитай әмәлдарини уйғур районидики кишилик һоқуқ дәпсәндичилики җинайитигә четишлиқ дәп қарап җазалиғаниди. Хитайму явропадики бәзи сиясий әрбаблар, алимлар вә тәтқиқат орунлириға өч елиш характерлик җаза йүргүзгәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт