“Wolks wagén” aptomobil shirkiti Uyghur diyarining weziyitidin xewersiz ikenlikini bildürdi

Yéqinda ijtima'iy taratqularda gérmaniyening “Wolks wagén” aptomobil shirkitining ijra'iy emeldarining Uyghur diyaridiki jaza lagérlirigha solan'ghan Uyghurlarning weziyitidin bixewer ikenlikini bildürgen bir sin körünüshi tarqalghan.

Mezkur sin körünüshi 15-aprél küni twittér torida élan qilin'ghan. Sin körünüshide en'gliye radi'o shirkiti (BBC) ning muxbiri “Wolks wagén” aptomobil shirkitining ijra'iye emeldaridin Uyghur diyarida “Wolks wagén” aptomobilini ishlepchiqirish esliheliri bar-yoqluqini sorighinida, u, rayonda shu xildiki eslihelerning barliqidin xushal ikenlikini hem pexirlinidighanliqini bildürgen. 

Arqidinla muxbirning “Undaqta siz xitay bilen hemkarlishiwatqanliqingizdinmu pexirlinemsiz?” dégen so'aligha mezkur emeldar jawab bérip: “Shundaq, biz yene Uyghur rayonida qulayliq eslihelirini ishlep chiqirimiz” dégen. 

Axirida muxbir uninggha xitayning Uyghur diyaridiki Uyghurlargha yürgüzüwatqan qattiq qol siyasitini qisqiche chüshendürüsh bilen birge uning Uyghur diyarigha ishlepchiqirish eslihelirini qurushtin pexirlinishining toghra emeslikini éytqinida, u, özining bu mesilige baha bérelmeydighanliqini hemde rayonning weziyitidin pütünley xewersiz ikenlikini sözlep ötken.

Twittérda tarqalghan mezkur sin körünüshige en'gliye nottingxam uniwérsitétining tetqiqatchisi, Uyghurshunas rayn sammu baha sözi yazghan. U xétide pakistan bash ministiri imran xanni tilgha alghan. 

Ötken mezgilde xitayning Uyghurlargha yürgüzüwatqan qattiq basturushlirigha qarita pakistan bash ministiri imran xan özining bundaq bir weziyetning barliqidin xewiri yoqluqini bildürgen idi.