«Волкс ваген» аптомобил ширкити уйғур дияриниң вәзийитидин хәвәрсиз икәнликини билдүрди

Мухбиримиз сада
2019-04-16
Елхәт
Пикир
Share
Принт

Йеқинда иҗтимаий таратқуларда германийәниң «волкс ваген» аптомобил ширкитиниң иҗраий әмәлдариниң уйғур дияридики җаза лагерлириға соланған уйғурларниң вәзийитидин бихәвәр икәнликини билдүргән бир син көрүнүши тарқалған.

Мәзкур син көрүнүши 15-апрел күни твиттер торида елан қилинған. Син көрүнүшидә әнглийә радио ширкити (BBC) ниң мухбири «волкс ваген» аптомобил ширкитиниң иҗраийә әмәлдаридин уйғур диярида «волкс ваген» аптомобилини ишләпчиқириш әслиһәлири бар-йоқлуқини сориғинида, у, районда шу хилдики әслиһәләрниң барлиқидин хушал икәнликини һәм пәхирлинидиғанлиқини билдүргән. 

Арқидинла мухбирниң «ундақта сиз хитай билән һәмкарлишиватқанлиқиңиздинму пәхирлинәмсиз?» дегән соалиға мәзкур әмәлдар җаваб берип: «шундақ, биз йәнә уйғур районида қулайлиқ әслиһәлирини ишләп чиқиримиз» дегән. 

Ахирида мухбир униңға хитайниң уйғур дияридики уйғурларға йүргүзүватқан қаттиқ қол сияситини қисқичә чүшәндүрүш билән биргә униң уйғур дияриға ишләпчиқириш әслиһәлирини қуруштин пәхирлинишиниң тоғра әмәсликини ейтқинида, у, өзиниң бу мәсилигә баһа берәлмәйдиғанлиқини һәмдә районниң вәзийитидин пүтүнләй хәвәрсиз икәнликини сөзләп өткән.

Твиттерда тарқалған мәзкур син көрүнүшигә әнглийә ноттиңхам университетиниң тәтқиқатчиси, уйғуршунас райн самму баһа сөзи язған. У хетидә пакистан баш министири имран ханни тилға алған. 

Өткән мәзгилдә хитайниң уйғурларға йүргүзүватқан қаттиқ бастурушлириға қарита пакистан баш министири имран хан өзиниң бундақ бир вәзийәтниң барлиқидин хәвири йоқлуқини билдүргән иди.

Пикирләр (0)
Share
Толуқ бәт