Явропа иттипақи хитайдин мустәқил тәкшүргүчиләрниң уйғур диярида тәкшүрүш елип беришигә йол қоюшни тәләп қилған

Мухбиримиз әркин
2020-09-14
Елхәт
Пикир
Share
Принт

Явропа иттипақи 14-сентәбир күни хитай даирилиридин мустәқил тәкшүргүчиләрниң бейҗиң һөкүмити уйғурларниң кишилик һоқуқлирини еғир дәпсәндә қилиш билән әйиблиниватқан уйғур диярида мустәқил тәкшүрүш елип беришини тәләп қилған.

Фирансийә агентлиқиниң хәвәр қилишичә, явропа кеңишиниң президенти чарлес мишел бу чақириқниң 14-сентәбир хитай компартийәсиниң баш секретари ши җинпиң билән видейо арқилиқ өткүзүлгән явропа иттипақи-хитай башлиқлар йиғинида оттуриға қоюлғанлиқи, явропа иттипақи тәрәпниң йәнә хоңкоң мәсилисидики әндишилириниму оттуриға қойғанлиқини билдүргән.

Чарлес мишел: «биз хитайниң шинҗаң вә тибәттики аз санлиқ милләтләргә тутқан муамилиси, кишилик һоқуқ қоғдиғучилириға вә ахбаратчиларға тутқан позитсийәсигә қарита әндишилиримизни қайта тәкитлидуқ,» дегән. Фирансийә агентлиқиниң хәвиридә баян қилишичә, чарлес мишел йәнә: «биз мустәқил тәкшүргүчиләрниң шинҗаңда тәкшүрүш елип беришини тәләп қилдуқ шундақла биз йәнә халиғанчә тутқун қилинған шиветсийә пуқраси го миңхәй билән икки канада пуқрасини қоюп беришкә чақирдуқ,» дәп көрсәткән.

Буниң алдида дуня уйғур қурултийи баянат елан қилип, явропа иттипақи вә мәзкур иттипаққа әза дөләтләрни хитай-явропа иттипақи башлиқлар йиғинидин пайдилинип, хитайниң уйғурларға қаритилған ирқий қирғинчилиқини тохтитиш үчүн конкрет һәрикәт қоллинишқа, хитай һөкүмитини җавабкарлиққа тартишқа чақирған иди. Баянатта явропа иттипақи «хитайниң уйғур хәлқигә қаратқан ирқий қирғинчлиқи, тибәтләр, моңғоллар, хоңкоңлуқлар вә хитай паалийәтчилири һәм адвокатлириниң кишилик һоқуқини дәпсәндә қилишиға қарита күчлүк вә принсипал мәйданини ипадиләш» кә үндәлгән иди.

Пикирләр (0)
Share
Толуқ бәт