Yawrupa parlaménti yawropa ittipaqi rehberlirini yéngi jaza hoqoqidin paydilinip Uyghur élidiki xitay emeldarlirini jazalashqa chaqirdi

Yawropa parlaménti yawropa ittipaqigha eza döletlerni yéqinda maqullan'ghan “Yershari kishilik hoquq jaza qanuni” ni ishlitip, Uyghur élidiki zulumgha ishtirak qiliwatqan xitay emeldarlirini jazalashni telep qildi.

Yawropa ittipaqining qanun chiqirish tarmiqi ötken hepte “Yershari magnétiskiy qanuni” ning ilhami bilen öz aldigha “Yer shari kishilik hoquq jazalash tüzümi” dep atilidighan bir kishilik hoquq qanunini maqullighan idi.

Yawropa ittipaqi bu qanunni maqullap uzun ötmey, yawropa parlaménti xitay munasiwetler wekiller ömikining bashliqi réynxard butikofér Uyghurlargha qaritilghan basturush siyasitining bash ijrachisi chén chüen'goning mezkur kishilik hoquq méxanizmi boyiche jazalinishni xalaydighanliqini bildürgen.

“Jenubiy xitay etigenlik pochtisi” ning xewer qilishiche, yéqinda yawropa ittipaqining tashqiy siyasetlerge mes'ul mudiri josép borrélmu Uyghurlargha qiliniwatqan ziyankeshlikke qarita jaza tedbiri yürgüzüsh pilani bar-yoqluqi heqqidiki so'algha duch kelgen iken.

Yawropa parlaménti bolsa bügünki chaqiriqida yawropa ittipaqigha eza döletlerning xitay hökümitining Uyghurlargha qaritilghan keng kölemlik tutqun herikiti we ularni mejburiy emgekke sélishida mes'uliyiti bolghan xitay emeldarliri we bingtüen qatarliq mu'essesilirini tézdin jazalishini telep qilghan.