Amérikadiki yehudiy teshkilatliri béyjing qishliq olimpikini bayqut qilish chaqiriqini kücheytken

• Muxbirimiz irade
  2021-08-12

2021-Yilliq tokyo olimpik musabiqisi ayaghlishishi bilen amérikadiki yehudiy teshkilatliri 2022-yilida béyjingda ötküzülidighan qishliq olimpik musabiqisini bayqut qilish chaqiriqini bashliwetken.

Yehudiy ichki xewerliri torining bildürüshiche, merkizi amérikadiki “Dunya yehudiy közitish teshkilati” ijra'iye mudiri sérina obérshtéyn yehudiylargha qirghinchiliq yürgüzgen natsistlar gérmaniyesining 1936-yili olimpikqa sahibxaniliq qilishi bilen Uyghurlargha qirghinchiliq yürgüzüwatqan béyjing hökümitining 2022-yilliq béyjing qishliq olimpik musabiqisige sahibxaniliq qilishi bir – birige oxshash, dégen. U amérika we bashqa démokratik ellerning bu musabiqini diplomatiye jehettin bayqut qilishi kéreklikini bildürgen.

Xewerde éytilishiche, hazirghiche dunya yehudiy közitish teshkilati we amérika yehudiylar komitéti qatarliq yehudiy teshkilatliri béyjing olimpik musabiqisini diplomatik yollar bilen bayqut qilishni qollaydighanliqini bildürgen. Amérika yehudiylar komitétining bash ijra'iye emeldari dawid xarris ependi sözide “Amérika béyjingda ötküzülidighan qishliq olimpikni bayqut qilishqa bashlamchiliq qilishi kérek, musabiqige héchqandaq resmiy wekil ewetmesliki kérek” dégen.

Melum bolushiche, yehudiylarning ijtima'iy munasiwet guruppilirigha wekillik qilidighan künlük teshkilat bolghan yehudiylar ammiwi munasiwet kéngishi 2021-yili 4-ayda Uyghur qirghinchiliqini eyibleydighan qarar maqullap chiqqandin kéyin, béyjing olimpik musabiqisini bayqut qilish pilanini muzakire qilishqa bashlighan iken. Yehudiylar ammiwi munasiwet kéngishining alaqe ishliri mu'awin diréktori tammi gildén yehudiy ichki xewerliri torigha qilghan sözide “Teshkilatimiz amérika emeldarlirini olimpikni purset süpitide ishlitip, xitayning kishilik hoquq depsendichilikige qarshi turushni gewdilendürüshke chaqirip keldi, biz amérikaning kéler yili bu tirishchanliqini dawamlashturushini ümid qilimiz” dégen.