Amérika “Yehudiylar ammiwi ishlar kéngishi” Uyghur irqiy qirghinchiliqini eyibleshni qarar qildi

Amérikadiki yehudiy guruppilirining asasliq siyaset merkizi bolghan “Yehudiylar ammiwi ishlar kéngishi” xitay hökümiti Uyghurlargha yürgüzüwatqan “Irqiy qirghinchiliq” ni eyibleshni qarar qilghan.

“Yehudiylar ammiwi ishlar kéngishi” ning qararliri adette bashqa nurghun yehudiy teshkilatlirining öz-ara muzakirisi netijiside chiqirilidighan hemde amérikadiki yehudiylarning pa'aliyet-heriketlirining yönilishini belgileydighan bolghachqa, ularning qararliri intayin muhim ehmiyetke ige iken.

“Yérusalim pochtisi” gézitining xewer qilishiche, mezkur kéngesh yéqinda barliq döletlik we yerlik yehudiy teshkilatliri birlikte chaqirghan ikki künlük qurultaydin kéyin bu qararni élan qilghan. Qararnamida mundaq déyilgen: “Yehudiylar xitay kompartiyesini Uyghurlargha qaratqan irqiy qirghinchiliq we basturushlirini axirlashturushqa, shundaqla öz chégrasi ichide yashaydighan bashqa az sanliq milletler we diniy az sanliqlarni ézishni toxtitishqa chaqiridu.”

Xewerde éytilishiche, mezkur qarar yehudiylarning Uyghurlarni qollash heriketlirining küchiyishide özini namayen qilidighan bolup, qarar boyiche yehudiylar ammiwi ishlar kéngishi öz künlüki astidiki barliq teshkilatlarni Uyghur irqiy qirghinchiliqigha qarshi söz qilishqa we bashqa jem'iyet we guruppilar bilen hemkarliship “Uyghurlargha qaritilghan wehshiylikning aldini élish üchün asasiy qatlam herikiti berpa qilishqa” chaqiridiken.

Mezkur kéngesh amérikadiki eng küchlük lobichi guruppilarning biri bolush süpiti bilen amérika dölet mejlisi we hökümitining siyaset belgilishigimu belgilik tesir körsitip kelmekte.