Xitayning londondiki elchixanisi aldida bir yehudiy kishi Uyghurlarni qoghdash namayishi ötküzüp kelmekte

Muxbirimiz erkin
2019-06-03
Élxet
Pikir
Share
Print

En'gliyelik bir ortadoks yehudisi her heptide ikki qétim en'gliye paytexti londondiki xitay elchixanisining medeniyet bashqarmisi aldida yalghuz kishilik namayish ötküzüp, xitayning Uyghurlarni yighiwélish lagérlirigha qamighanliqigha naraziliq bildürüp kelmekte iken.

En'gliye taratqulirining xewer qilishiche, andréw isimlik bu yehudiy namayishchining naraziliq pa'aliyiti bu yil 3‏-aydin bashlan'ghan bolup, nöwette uninggha balush soloman isimlik yene bir yehudiy namayishchi qoshulghan. Andréw en'gliyediki "Yehudiy hadisiliri" namliq tor gézitining muxbirigha qilghan sözide özining yalghuz kishilik namayish qilishigha Uyghurlarning hazirqi ehwali bilen natsistlarning yehudiylarni "Eng axirqi hel qilish charisi" otturisidiki oxshashliqning türtke bolghanliqini bildürgen.

Andréwning qeyt qilishiche, u kochidiki matorluq yoluchilarning "Xitayda 3 milyondek musulman jaza lagérlirigha qamaldi" dégen lozunkigha diqqitini tartish üchün her qétimliq namayishni kechlik ishtin chüshüsh waqtigha orunlashturghan iken. U Uyghur rayonida yüz bériwatqan tragédiyelerge süküt qilip turushqa bolmaydighanliqini tekitlep, "Xitayda texminen 3 milyondek adem jaza lagérlirigha qamaldi. Bunchilik zor kölemde adem tutqun qilinsa, men qandaqlarche héch ish bolmighandek olturalaymen. Méning apam manga: "buningdin 80 yil awwal bizning ejdadlirimiz jaza lagérlirigha solan'ghanda dunya süküt qilghan, bu toghra emes idi dep sawaq béretti. Men xata bir ishni körüp turup qarap tursam we süküt qilsam bolmaydu" dégen.

"Yehudiy hadisiliri" torining xewiride lagérlardiki tutqunlarning éghir kishilik hoquq depsendichilikige uchrawatqanliqigha da'ir delillerning köpiyiwatqanliqi, sün'iy hemrah süretliri bu lagérlarning mewjutluqini ispatlap bériwatqanliqi ilgiri sürülgen. Xewerde qeyt qilinishiche, andréw xitayning yighiwélish lagérliri bilen natsistlarning "Yoqitish lagérliri" ni perqlendürsimu, lékin u "Eng axirqi hel qilish charisi" ning dunya nechche yilghiche héchqandaq inkas bildürmigendin kéyin yolgha qoyulghanliqini tekitligen. Xewerde yene xitayning londondiki elchixanisining xitay hökümitining Uyghurlarni keng kölemlik tutqun qilghanliqi we teqib qiliwatqanliqini ret qilip, "Bularning hemmisi pütünley asassiz we pakitlargha uyghun emes" dégenliki tekitlen'gen.

Toluq bet