En'giliye yehudi jama'iti rehberliri en'giliye parlamént ezaliri bilen Uyghur mesilisi heqqide jiddiy körüshken

• Muxbirimiz erkin
  2021-01-15

En'giliye yehudi jama'iti rehberliri 14-yanwar en'giliye parlamént ezaliri bilen jiddiy körüshüp, Uyghurlarning weziyitini tonushturghan we soda qanuning irqiy qirghinchiliq toghrisidiki maddisini qollishini telep qilghan. En'giliye parlaméntining awam palatasi kéler hepte en'giliye soda qanunigha en'giliye aliy soti irqiy qirghinchliq sadir qildi, dep qarighan döletler bilen soda qilishni toxtitish toghrisidiki qanun maddisini kirgüzüsh-kirgüzmeslikni qarar qilidu. Bu maddida shexs yaki teshkilatlarning en'giliye aliy sotigha irqiy qirghinchiliq toghrisida erz qilishigha yol qoyulghan.

Közetküchiler, bu madda Uyghurlarning en'giliye aliy sotigha xitayning Uyghurlargha “Irqiy qirghinchiliq” yürgüzüwatqanliqi heqqide erz qilishi üchün yol échip béridighanliqini bildürgen. Lékin en'giliye hökümiti uning xitay bilen bolghan “Soda munasiwitige buzghunchiliq qilishi” din ensirep, qarshi qarshi turghan idi. “Algéméynér zhurnili” gézitining xewer qilishiche, “En'giliye yehudi wekiller kéngishi” ning prézidénti maréy fon dér zayil 12-yanwar “En'giliye hökümitining bu qanun layihesini qollawatqan konsérwatip parlamént ezalirigha qulaq sélishi” ni telep qilghan.

U özlirining bu wehshilikni “Burun körgenliki”, “Uning nege élip bardighanliqini éniq bilidighanliqi” ni tekitlep: “Hazir heriket qilsimu kechikmeydu. Biz birlikte xitay hökümitige eger ular bu yolni dawamlashtursa, buning xelq'ara aqiwiti barliqini küchlük hés qilduralaymiz,” dégen. Yehudi jama'iti rehberlirining parlaménttiki uchrishishigha dunya Uyghur qurultiyining en'giliyediki wekili rehime mahmutmu qatnashqan bolup, u Uyghurlarning weziyiti heqqide doklat bergen.