En'gliyediki yehudiy jama'itining 27-yanwar "Chong qirghinchiliq" xatire küni Uyghurlargha merkezlishidiken

Muxbirimiz erkin
2021-01-25
Share

En'gliyediki yehudiy jama'iti rehberlirining 27-yanwar yehudiy "Chong qirghinchiliqi" xatire küni Uyghur mesilisige merkezlishidighanliqi, Uyghurlar uchrawatqan zulumni tenqidleydighanliqi bildürüldi. Dunyaning her qaysi jayliridiki yehudiylar 27-yanwar pa'aliyet ötküzüp, natsistlarning 2-dunya urushida yehudiylargha élip barghan chong qirghinchiliqini xatirileydu. En'gliyediki "Muhapizetchi" gézitining xewer qilishiche, en'gliyediki yehudiy jama'itining rehberliri bu yilqi "Chong qirghinchiliq" xatire künining Uyghurlar uchuwatqan zulumgha merkezlishidighanliqini bildürgen.

Xewerde, yehudiy jama'iti rehberlirining "Yehudiylar, Uyghurlar uchrawatqan zulumgha qarshi sözleshke heqliq we ularning exlaqiy mejburiyiti bar" dep körsetkenliki bildürülgen. "Muhapizetchi" gézitining tekitlishiche, "Réné kassin" namliq yehudiy kishilik hoquq teshkilatining ijra'iye diréktori miya xasénson gros, "Chong qirghinchiliq" xatire küni diqqetni zulumgha uchrawatqan bashqa xelqlerge merkezleshtürüshning yehudiylar üchün "Muhimliqi" ni bildürgen.

En'gliyediki yehudiy dini konsérwatiplar éqimi(Masorti Judaism)ning yuqiri derijilik diniy ölimasi jonatan witténbérg mundaq dégen: "Biz öz xelqimizning jismi arqiliq ziyankeshlikning néme ikenlikini ögenduq. Bashqa xelqlerge qarita ularning kimliki seweblik jinayet sadir qilinsa, uninggha süküt qilishni exlaqiy jehettin chüshendürgili bolmaydu".

Uning tekitlishiche, en'gliyediki yehudiy jama'iti Uyghurlarni qoghdash üchün heriket qilish toghrisidiki chaqiriqlarni qollaydiken. En'gliyediki yehudiy jama'iti Uyghurlar mesiliside nahayiti aktip bolup, ular xitaygha küchlük tedbir qollinishni telep qilip kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet