Xitay hökümiti yéza-qishlaqlar arqiliq yéngi “Seddichin sépili” salmaqta

“Nyu-york waqti géziti” gézitining yéqinqi obzorida éytilishiche, xitay hökümiti ghayet zor maliye küchi ajritish bedilige özining ottura asiya we jenubiy asiyadiki döletler bilen chégralinidighan liniyelirige ahale olturaq rayoni berpa qilip yéngi yéza-qishlaqlarni hasil qilghan. Chégra boyliridiki bu olturaq liniyeliri chong jehettin seddichin sépilining sheklini alghan bolup, obzorda bu hal xitayning sirtqa qarita zémin kéngeymichilikining bashlinishi, dep qaralghan.

Obzorda éytilishiche, bu olturaq ahale liniyeliri xitayning jenubiy déngizdiki zémin dawasigha mas qedemde otturigha chiqiwatqan bolup, yéqinqi sün'iy hemrah süretliri bu xildiki olturaq öylerning san we kölem jehette barghanséri éship méngiwatqanliqini körsetken. Bolupmu hindistan bilen chégralinidighan himalaya taghliq rayonida her bir ötkel boyida birdin ahale olturaq rayoni berpa qilin'ghan. Bu jaylarda taghdin bashqa héchnerse bolmasliqtek ré'alliq tüpeylidin xitay köchmenliri bu yerlerde yashashni xalimighan. Emma hökümetning ghayet zor maddiy yardem bérishi tüpeylidin bu xildiki olturaq ahale nuqtiliri hazir zich ahale bilen qaplinip bolghan.

Obzorda alahide tekitlen'gen yene bir nuqta shuki, bu olturaq öyler namda “Puqralarning olturaqlishishi üchün” déyilsimu, emeliyette xitay armiyesini yol, intérnét tori we tok bilen teminlesh wezipisinimu öteydiken. Yene bir yaqtin bu xil olturaq öy liniyesi xitay hökümiti üchün “Köz-qulaq” bolush rolini oynaydighan bolup, chégradin qachidighanlarni tosup qalidighan birinchi liniye hésablinidiken. Xitay metbu'atliri bu jaylardiki olturaq ahalini “Wetenperwer chégra qoghdighuchiliri” dep teripligen.