Yéngi zélandiyediki Uyghur birleshmisi xitay konsolxanisining aldida namayish qilghan

4-Ayning 21-küni yéngi zélandiyening étiro'a Uyghur birleshmisi bilen xelq we tinchliq ittipaqi ezaliri birlikte xitayning étiro'a konsolxanisi aldida namayish qilip, xitayning Uyghurlargha yürgüzüp kéliwatqan ziyankeshliklirige qarshi naraziliq bildürgen.

Étiro'a Uyghur birleshmisining bayanatchisi éliyana mundaq dégen: “Biz xitay konsolxanisining aldigha yighilip, xitay kompartiyesining qolida azab chékiwatqan Uyghurlardin endishe qiliwatqanliqimizni bildürduq. Biz özimizdiki erkinliktin paydilinip, xitay bésiwalghan shu rayondiki xelqning hoquqini qoghdashni dawamlashturimiz”.

Mezkur birleshme élan qilghan axbarattin melum bolghinidek, bu birleshmining terkibide Uyghurlar üchün xalis küch chiqiriwatqan yéngi zélandiyelik yashlar bar bolup, ularning Uyghurlar uchrawatqan zulumgha bolghan tonushi nahayiti chongqur, xitayning jinayitige qarshi turush iradisi küchlük iken.

Uyghur birleshmisidin sam wénsént mundaq dégen: “Ehwal nahayiti jiddiy, waqitning ötüshige egiship biz téximu köp Uyghurlarning lagérda ölüp kétishidin ensireymiz. Biz shuni bilimizki, bu hergiz xitayning ichkiy ishi emes, belki xelq'araliq kishilik hoquq mesilisi. Nahayiti éniqki, xitayning bu siyasetliri Uyghurlarni yoqitishnila meqset qilghan”.

Yéqinqi xewerlerdin melum bolushiche, yéngi zélandiye derijidin tashqiri fondi kishilik hoquq depsendichiliki jinayitige chétishliqi tüpeylidin amérikaning qara tizimlikige kirgen ikki xitay shirkitige 500 ming dollar meblegh salghan.

Éliyananing bildürüshiche, yéngi zélandiye karxaniliri xitay bilen soda qilip, xitayning Uyghurlargha yürgüzüwatqan irqiy qirghinchiliq jinayitige shérik bolmasliqi, haram paydini kishilik hoquqning üstige qoyuwalmasliqi kérek iken. Hökümetni bu mesilige sel qarimasliqqa, belki bu jinayetni toxtitish üchün ünümlük tedbirlerni élishqa chaqirish kérek iken.