Yéngi zélandiye bash ministiri xitay bilen yarishishning qiyinlishiwatqanliqini bildürdi

Yéngi zélandiye bash ministiri jasinda ardérn yéngi zélandiye bilen xitay otturisidiki ixtilap uning xitay bilen yarishishini qiyinlashturiwatqanliqini bildürgen. Roytér s agéntliqining xewer qilishiche, jasinda ardérn bu sözni 3-may küni yéngi zélandiyening okland shehiride ötküzülgen xitay soda bashliqlar yighinida qilghan bolup, u xitay bilen yéngi zélandiye arisida “Qilmaydighan, qilalmaydighan we qoshulmaydighan ishlar” barliqi, biraq bu ixtilap ularning munasiwitini belgilimesliki kéreklikini tekitligen.

Jasinda ardérn, xitay bilen bolghan qaysi konkrét ixtilap we perqler ularning munasiwitini qiyinlashturiwatqanliqini tepsiliy chüshendürmigen. Lékin u bu sözlerni yéngi zélandiyening ACT partiyesi ötken hepte parlaméntqa xitayning Uyghurlargha “Irqiy qirghinchiliq” qiliwatqanliqini étirap qilish toghrisida qarar layihisi sunidighanliqini élan qilghan mezgilde qilghan.

ACT Partiyesining bayanatchisi brok fon wéldén bu heqtiki bayanatida “Biz démokratik dölet bolush süpitide bizning e chong soda shérikimiz insaniyetke qarshi jinayet sadir qilsa uninggha qarap tursaq bolmaydu” dégen.

Roytérs agéntliqining bildürüshiche, yéngi zélandiye xitayni tenqid qilish toghrisida yéngi zélandiye, amérika, en'gliye, kanada, awstraliyeni öz ichige alghan “Besh köz” istixbarat we bixeterlik guruhining bésimigha uchrap kelgen iken. Yighinda jasinda ‍ardérn yene mundaq dégen: “Xitayning dunyadiki roli kücheygenséri we özgergenséri bizning menpe'et we qimmet qarishini shekillendürgen ikki sistéma arisidiki perqni yarashturush téximu qiyinlishiwatidu…. . . Mana bu biz we hindi-tinch okyan rayonidiki nurghun döletler, shuningdek yawropa we bashqa rayonlardiki döletler duch kéliwatqan xiris”,