Йеңи зеландийә: "б д т дики уйғур паалийити шинҗаң вәзийитигә диққәт қозғаш үчүн бир пурсәт"

Мухбиримиз әркин
2021-05-11
Share

Йеңи зеландийә 12-май б д т да өткүзүлидиған уйғур паалийитигә вакаләтчи болғанлиқини дәлилләп, бу паалийәтниң "шинҗаңдики кишилик һоқуқ вәзийитигә қарита илгириләп диққәт қозғаш үчүн бир пурсәт" ‍икәнликини билдүргән. Йеңи зеландийәдики "нюзхаб" қанилиниң хәвәр қилишичә, йеңи зеландийә сода вә ташқи ишлар министирлиқи хитайниң бу мәсилидики "дипломатик нотисиға баһа бәрмәйдиғанлиқи", бирақ йеңи зеландийәниң бу паалийәткә қатнишидиғанлиқини дәлиллигән.

"нюзхаб" ниң хәвиридә ейтилишичә, йеңи зеландийә сода вә ташқи ишлар министирлиқиниң баянатчиси "бу паалийәт шинҗаңниң кишилик һоқуқ вәзийитигә илгириләп көңүл бөлүши, шуниңдәк хәлқара җәмийәтниң җүмлидин б д т системиси, әза дөләтләр вә аммиви җәмийәтләрниң шинҗаңдики уйғур вә башқа етник, диний җамаәтләрниң кишилик һоқуқини қандақ алға сүрүши вә һәмкарлиқ елип бериши ‍үчүн бир пурсәт.

Йеңи зеландийә сода вә ташқи ишлар министирлиқиниң баянати хитай һөкүмити б д т ға әза дөләтләргә нота әвәтип, уларни 12-май америка, германийә, әнглийәниң саһибханилиқида ‍өткүзүлидиған бу паалийәткә қатнашмаслиқни тәләп қилған бир вақитта елан қилинған.

Мәлум болушичә, хитайниң б д т дики вәкили дүшәнбә күни баянат елан қилип, америка, германийә вә әнглийәдин бу паалийәтни бикар қилишни тәләп қилған. Хитай тәрәп баянатида америкаға һуҗум қилип, "америка вә униң әгәшкүчилириниң мусулманларни ‍өлтүргәнлики" ни егири сүргән. Бирақ ‍өзиниң уйғурларға "ирқий қирғинчилиқ" қилғанлиқини инкар қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт