Yéngi zélandiye bash ministiri xitaydiki ziyaritide Uyghur mesilisini tilgha alghan-almighanliqi heqqide éniq jawab bermigen

Muxbirimiz irade
2019-04-02
Élxet
Pikir
Share
Print

1-Aprél küni, xitayda resmiy ziyarette bolghan yéngi zélandiye bash ministiri jeysinda ardérin xitaydiki ziyaritide kishilik hoquq mesilisini otturigha qoyghanliqini bildürgen. Biraq uning Uyghur musulmanliri uchrawatqan zulum heqqide toxtalghan-toxtalmighanliqi éniq emes.

Bu heqte yéngi zélandiyening "Xewer merkizi" namliq xewer torining bildürüshiche, u muxbirlarning Uyghur élidiki lagérlar mesilisini tilgha alghan-almighanliqi heqqidiki so'aligha jawab bermigen bolsimu emma özining kishilik hoquq mesilisini tilgha alghanliqini éytip: "Men kishilik hoquq mesilisini xitay dölet re'isi we bash ministiri bilen körüshkende biwasite otturigha qoydum. Qolumdin kélidighini mushunchilik" dégen. 

Yéngi zélandiye bash ministiri jeysinda ardérin yéqinda yéngi zélandiyediki ikki meschitke élip bérilghan qoralliq hujumni qattiq eyiblep, musulmanlar arisida birdinla abruy qazan'ghan idi. Del shundaq bir peytte xitaygha resmiy ziyaretke mangghan yéngi zélandiye bash ministiri jeysinda ardérinning Uyghur musulmanlirining mesilisi üstide qandaq bir pozitsiye bildüridighanliqi küchlük diqqet qozghighan. 

U seperge atlinish aldida, kishilik hoquqni közitish teshkilati bayanat élan qilip, bash ministir ardérn xanimni ziyaret dawamida Uyghur rayondiki lagérlar mesilisini ashkara otturigha qoyushqa dewet qilip, uni musulmanlarning heq-hoquqini qoghdashta oynighan xelq'araliq bashlamchiliq rolini xitaydiki musulmanlar üchünmu oxshash tetbiqlishi kéreklikini eskertken. 

Halbuki, bu heqtiki so'allarni jawabsiz qoyghan ardérin xanim: "Yéngi zélandiyening kishilik hoquqtin ibaret asasiy prinsipta ching turidighanliqi we bu heqte kélidighan künlerde dawamliq xizmet qilidighanliqini" ipade qilghan.

Toluq bet