«Йәр шари вақти» гезити, хитай карханилириниң «әрзан баһалиқ уйғур әмгәк күчлири» ни ишлитиватқанлиқини етирап қилди

Мухбиримиз әркин
2019-11-26
Елхәт
Пикир
Share
Принт

Хитайниң «йәр шари вақти гезити» уйғур райониға келип кәң көләмлик завут ечиватқан хитай карханилириниң «әрзан баһалиқ уйғур әмгәк күчлири» ни ишлитиватқанлиқини етирап қилди.

Хәвәрдә қәйт қилинишичә, ақсу қатарлиқ җайларда завут ачқан нурғун хитай карханилириниң көзи бу райондики әрзан баһалиқ уйғур әмгәк күчлиригә тикилмәктикән. Бу хәвәр хәлқарада хитай һөкүмитиниң лагердики уйғур тутқунларни завут-карханиларда мәҗбурий әмгәккә селип, хәлқара әһдинамиларға хилаплиқ қиливатқанлиқи, шуңа бу завут карханиларниң мәһсулатлирини чәкләш тәлипи оттуриға қоюлуватқан мәзгилдә елан қилинип диққәт қозғиди.

Кишилик һоқуқ тәшкилатлириниң доклатлирида вә лагер шаһитлириниң баянлирида, хитай даирилириниң йиғивелиш лагерлиридики «ипадиси яхши» дәп қаралған тутқунларни бу кархана-завутларда һәқсиз яки азрақ иш һәққи берип мәҗбурий әмгәккә селиватқанлиқи илгири сүрүлүп кәлди. Йеқинда америка чегра вә тамозһна идариси хотәндики «тәйда кийим-кечәк чәклик һәссидарлиқ ширкити» ниң мәһсулатлирииң америка базириға киришини чәклигән. Шундақла бәзи хәлқара чоң ширкәтләр уйғур районидики бу хил карханилар билән болған сода алақисини үзгәнликини җакарлиғаниди.

«Йәр шари вақти» гезитиниң билдүрүшичә, 2019‏-йилиниң дәсләпки 9 ейида ақсу вилайитигә 523 кархана келип орунлашқан болуп, бу өткән йилқидин азрақ кәм 25% артқан. Кучар, шаяр қатарлиқ наһийәдики хоңяң тоқмучилиқ, юшяң хуяң химийә ширкити, шинҗаң җин лийүән кийим-кечәк ширкити қатарлиқлар «әрзан баһалиқ уйғур әмгәк күчлири» ни ишқа селиватқан әнә шундақ карханилар икән.

Хәвәрдә қәйт қилинишичә, юңшяң хуяң химийәт ширкитиниң бир директори «шинҗаңда иш һәққиниң интайин төвәнлики» ни билдүрүп, «биз техиму көп завутларни көчүрүп келишни сөзлишиватимиз» дегән. Лекин хәвәрдә йәнә йәрлик даириләр бу карханиларни «иш һәққи интайин төвән әмгәк күчи» билән тәминлигән болсиму, лекин бәзи карханиларниң «пайдини қатнаш транспорт хираҗити йәп кетип бариду» дәп қаһшаватқанлиқи билдүрүлгән.

Пикирләр (0)
Share
Толуқ бәт