Peyziwat nahiyeside 6.4 Bal yer tewrep, tömür yol qatnishi toxtitilghan

19-Yanwar küni Uyghur diyarining peyziwat nahiyeside 6.4 Bal yer tewrep, az dégende bir adem ölgen.

Shinxu'a agéntliqining xewer qilishiche, yer tewresh shu yerning waqti kech sa'et 9:27 de yüz bergen bolup, shu küni kéchiche az dégende 8 qétim egeshme yer tewrigen.

Yer tewresh rayonidiki égiz qewetlik binalarda olturushluq ahaliler qattiq tewrinish hés qilghan. Xitay taratqulirining bildürüshiche, nurghun ahaliler öylirige kirishtin ensirep kéchiche talada qon'ghan. Xitay taratqulirining xewerliride az dégende bir ademning ölgenliki, ikki balini öz ichige alghan bir qisim kishilerning yarilan'ghanliqi, nurghun öylerge dez ketkenliki ilgiri sürülgen bolsimu, lékin uning tepsiliy ehwali, qanche a'ilining tesirge uchrighanliqi, qanchilik ademning talada qalghanliqi, ularning qandaq orunlashturulghanliqi qatarliq tepsilatlar chüshendürülmigen.

Shinxu'a agéntliqining xewiride da'irilerning yer tewresh rayonigha xelq ishlar idarisi we sehiye xadimlirini ewetkenliki tekitlen'gen. Xewerde qeyt qilinishiche yer tewresh rayonidiki ahalilerni tarqaqlashturush dawam qilmaqta iken.

Xitay yer tewreshni ölchesh merkizi bu qétimqi yer tewreshning merkizining shimaliy mérdiyan 39.83 Giradus, jenubi parallél 77.21 Giradusqa jaylashqanliqi, tewresh chongqurluqining 16 kilométir ikenlikini bildürgen.

Shinxu'a agéntliqining xewer qilishiche, bu qétimqi yer tewresh poyiz qatnishigha tesir qilghan. Ürümchi-xoten arisida qatnaydighan 9 nöwetchi yoluchilar poyizining qatnishi waqitliq toxtitilghan. Nöwette xelqning yer tewresh rayonigha yardem qilish ishlirining qandaq boluwatqanliqi melum emes. Xitay hökümiti 2017‏-yili bashlighan chong tutqunda nurghun Uyghur xeyr-saxawetchilerni tutqun qilip, xeyr-saxawet ishlirini chekligen idi.