خىتاينىڭ «تەڭرىتاغ تورى»، «شىنجاڭ گېزىتى» تورى 19-فېۋرال كۈنى چىقارغان خەۋەردىن مەلۇم بولۇشىچە، ئۇيغۇر دىيارىدىكى ئۇچتۇرپان ناھىيەسىنىڭ كۆپ قىسىم جايلىرى سوغۇق ئېقىمنىڭ تەسىرىدە قار-بوران ۋە قۇم-بوران ئاپىتىگە ئۇچرىغان.
خەۋەردە، ھۆكۈمەت ئورۇنلىرىنىڭ ئۇچتۇرپان يامانسۇ يېزىسىدىكى ئادەم ۋە مال-چارۋىلارنى سوغۇقتىن ساقلاش ئۈچۈن جىددىي ھەرىكەتكە ئۆتكەنلىكى تەشۋىق قىلىنغان.
1-ئاينىڭ 23-كۈنى تاڭ سەھەردە ئۇچتۇرپان ناھىيەسىدە 7.1 بال يەر تەۋرىگەندىن كېيىن، خىتاي ھۆكۈمىتى ئۇچۇرلارنى قاتتىق قامال قىلغانىدى. خىتاي مەتبۇئاتلىرى، ئاپەت ئەڭ ئېغىر بولغان ئۇچتۇرپان يامانسۇ يېزىسىدا ئۈچ ئادەمنىڭ ئۆلگەنلىكى، 5 ئادەمنىڭ يارىلانغانلىقىنى خەۋەر قىلغان بولسىمۇ، ھەقىقىي ئەھۋال تا ھازىرغىچە بىلىنمەي كەلمەكتە. ئۆرۈلگەن، ۋەيران بولغان ئۆيلەر، ئۆيسىز قالغان كىشىلەرنىڭ قەھرىتان قىشتا قانداق پاناھلانغانلىقى ھەققىدە ھېچقانداق ئۇچۇر يوق.
يېقىنقى كۈنلەردە ئۇيغۇر رايونىنىڭ شىمالىدىكى سوغۇق ھاۋا ئېقىمىنىڭ ئۇچتۇرپان ناھىيەسى قاتارلىق جەنۇبتىكى ناھىيە، ۋىلايەتلەرگىمۇ تەسىر كۆرسىتىۋاتقانلىقى مەلۇم. 2-ئاينىڭ 19-كۈنى ئالتاينىڭ كۆكتوقاي ناھىيەسىدىكى ھاۋا تېمپېراتۇرىسى نۆلدىن تۆۋەن 52.3 گرادۇسقا يېتىپ، 64 يىلدىن بۇيانقى ئەڭ قاتتىق سوغۇق پەيدا بولغان. بۇنىڭغا ئەگىشىپ كەلگەن قار-بوران ئاپىتىدە ھەتتا قۇشلارمۇ توڭلاپ ئۆلگەن. خىتاي تەشۋىقات ۋاسىتىلىرىدە «شىمالدا قار-شىۋىرغان، جەنۇبتا قۇم-بوران ئاپىتى كۆرۈلدى، ئەمما ئۆلۈش-يارىلىنىش ئەھۋالى يوق» دېيىلگەن بولسىمۇ، ئاپەتنىڭ ھەقىقىي ئەھۋالى يەنىلا نامەلۇم ھالەتتە تۇرماقتا.