Йәркән наһийәсиниң конишәһәр райони пүтүнләй чеқип ташланған

• Мухбиримиз әзиз
  2021-09-14

Уйғур дияриниң һәрқайсий шәһәрлиридики конишәһәр районлириниң чеқилиши өткән он нәччә йил мабәйнидә изчил давам қилған болуп, 2018-йили 4-айда башланған йәркән наһийәси конашәһәр районини чеқиш қурулуши йеқинда толуқ тамамланған.

Хитай башқуришидики “тәңритағ тори” ниң 14-сентәбирдики хәвиридә ейтилишичә, йәркән конашәһәр районида “өйләр конирап кәткән, кочилар тарлишип кәткән вә һәммила җайни әхләт бесип кәткән” дегәндәк баһаниләр билән наһийәлик һөкүмәт конашәһәр районини “өзгәртип қуруш” ни қарар қилған. Буниң билән бу райондики сода вә олтурақ райони чеқилип, 50 миңға йеқин аһалә йеңидин селинған бина өйләргә көчүрүлгән. Хәвәрдә алаһидә қилип қазанчи кочисидики самсипәз абдуқаһар әнвәр вә йәккә тиҗарәтчи хәйригүл турсун қатарлиқ бир түркүм уйғурларниң ағзидин бу қурулуштин уларниң қанчилик “мәнпәәтдар” болғанлиқи баян қилдурулған һәмдә шу арқилиқ буниң әмәлийәттә хитай һөкүмитиниң уйғурларға қиливатқан “ғәмхорлуқи” икәнлики ишарә қилинған.

Уйғур кишилик һоқуқ қурулуши тәшкилати 2019-йилиниң ахири елан қилған “етиқад вәйранчилиқи” намлиқ зор һәҗимлик доклатта хитай һөкүмитиниң бу хилдики қәдимий қурулушлар районини чеқип өзгәртиш қурулуши тәнқидлинип: “буниңдики һәқиқий мәқсәд уйғурларниң миллий вә диний кимликини әслитидиған барлиқ шәйиләрни уйғурларниң көз алдидин өчүрүш, шундақла мушу хил вәйранчилиқни уйғурларни техиму тез сүрәттә хитайлаштуруш үчүн хизмәт қилдуруш” дәп көрситилгән иди.

Алақидар материялларда көрситилишичә, йәркән конашәһәр райони 1514-йилидин тартип йәкән сәидийә ханлиқиниң пайтәхти җайлашқан орун болуп, бир нәччә әсирлик сиясий вә мәдәнийәт мәркизи болуштәк тарихқа игә икән.