Dunya boyiche eng chong yéshil hédrogén ishlepchiqirish bazisi kucha nahiyeside quruldi

Xitay hökümiti bashqurishidiki “Xelq tori” ning 30-noyabirdiki xewiride éytilishiche, xitay néft-ximiye bash shirkiti béyjing, ürümchi we kucha qatarliq jaylarda tebriklesh murasimi ötküzüp, dunya boyiche eng chong kölemlik quyash énérgiyesidin paydilinip “Yéshil” (sap) hédrogén ishlepchiqirish bazisining kucha nahiyeside qurulush bashlighanliqini jakarlighan. Xewerde éytilishiche, bu baza ishqa kirishtürülgendin kéyin “Yéshil” yilliq hidrogén ishlepchiqirish miqdari 20 ming tonnidin ashidiken.

Xewerde éytilishiche, xitay néfit-ximiye bash shirkitining diréktori ma yongshéng bu heqte söz qilip: “Bu tür arqiliq shinjangning tebi'iy bayliq ewzellikini téximu jari qildurghili, shu arqiliq shinjangning iqtisadini tereqqi qildurup, döli'itmizning énérgiye menbesige képillik qilghili bolidu,” dégen.

Halbuki, ötken nechche on yil mabeynide xitayning eng chong énérgiye bazisi bolghan Uyghur diyaridiki néfit, tebiy gaz, kömür qatarliq énérgiye bayliqliri ghayet zor miqdarda xitay ölkilirige toshulup turghan bolsimu, Uyghur diyaridiki minglighan namrat Uyghur déhqanliri qishliq issinish üchün kéreklik bolghan kömür élishqimu qurbi yetmes halgha chüshüp qalghan idi. Bu jaylarda tekshürüshte bolghan fransiyelik fotograf patrik wak bu heqte toxtilip: “Bu jayda néfitlik qatarliq jaylarda pütünley xitaylar ishleydu. Kéwezlikte paxta téridighanlar pütünley Uyghurlar iken” dégen idi.

Nöwette mezkur hidrogén bazisiningmu xitay ölkiliridiki énérgiye éhtiyajini qamdashni meqsed qilidighanliqi, buningmu yerlik Uyghurlargha qilchilik menpe'et yetküzmeydighanliqi texmin qilinmaqta iken.