Хитай бу йилму уйғур елида оқуш йешиға йәтмигән балилар йәслилирини давамлиқ көпәйткән

Мухбиримиз әркин
2021-11-02
Share

Уйғурларни ассимилатсийә қилишта кәң көләмлик йәсли қуруп, асаслиқ нишанини уйғур балилириға қаратқан хитай һөкүмити, бу йилму йәсли қурулушини давамлиқ кәңәйткән. "шинҗаң хәвәрлири" ториниң билдүрүшичә, бу арқилиқ уйғур елида "сотсиялизим қурулушчилирини вә избасарлирини йетиштүрүп чиқиш хитайниң 14-бәш йиллиқ пилани мәзгилидики муһим нишанлириниң бири" икән. Уйғур аптоном районлуқ маарип назарити 2-ноябир күни "шинҗаң хәвәрлири" гә бәргән учурида, бу йил уйғур елидики оқуш йешиға йәтмигән балилар йәслилиригә 428 милйон йүән мәбләғ селинип, йәнә 28 орунда йеңи йәсли қурулғанлиқини билдүргән.

Хәвәрдә бу йәслиләрниң қайси районларда қурулғанлиқи вә униң оқуғучи мәнбәси тилға елинмиған болсиму, бирақ бу 28 йәслиниң 8400 нәпәр оқуш йешиға йәтмигән балиға орун һазирлиғанлиқини билдүргән. Хитай һөкүмити 2017-йили башланған вә бәзи ғәрб һөкүмәтлири һәм парламентлири тәрипидин "ирқий қирғинчилиқ" дәп әйибләнгән чоң тутқунда, лагер характерлиқ нурғун балилар йәслилирини қуруп, ата-аниси тутқун қилинған уйғур балилирини бу йәслиләрә орунлаштурған.

Чәт әл мутәхәссислири вә тәтқиқатчилириниң илгири сүрүшичә, нөвәттә 600 миңдин 800 миңғичә болған уйғур вә башқа мусулман аз санлиқ милләт балилири хитай һөкүмити тәрипидин "ятақлиқ мәктәпләр" дәп аталған бу орунларда "тәрбийә" көрмәктә икән. "шинҗаң хәвәрлири" ниң ейтишичә, хитайниң 14-бәш йиллиқ пилани мәзгилидики нишани 2025-йилиға қәдәр оқуш йешиға йәтмигән балилар йәслилири һәм толуқ оттура мәктәпләрниң омумий оқуғучи нисбитиниң 98 пирсәнттин юқури болушиға капатлик қилиш икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт