Уйғур елидики йәслиләрниң 96 пирсәнтидә хитай тили маарипи омумлишип болған

Мухбиримиз ирадә
2018-05-24
Share

Уйғур елидики йәслиләрниң 96 пирсәнтидә хитай тили омумлаштурулуп болунғанлиқи мәлум. Шинхуа агентлиқиниң хәвәр қилишичә, нөвәттә уйғур елидики йәсли балилириниң сани 1 милйон 370 миң нәпәр болуп, даириләр йәсли балилирини 3 йил ичидә хитай тилида тәрбийәләш сияситини 96 пирсәнткә йәткүзгән.

Хитайниң "қош тил" йәслилирини бундақ күчәп омумлаштуруши уйғур көзәткүчиләр күчлүк диққәт қиливатқан мәсилиләрниң бири. Улар, хитай тили вә мәдәнийитини өгитишни асас қиливатқан бу аталмиш "қош тил" йәслилириниң уйғурларни кичикидин тартипла ассимилятсийә қилишни мәқсәт қилғанлиқини илгири сүрүшмәктә.

Һалбуки, хитайниң шинхуа агентлиқи инглиз тилида тарқатқан хәвиридә, "қош тил" йәслилиридә аз санлиқ милләт балилириниң хитай тили өгинип, өз-ара чүшиниш вә техиму яхши пурсәтләргә еришишкә риғбәтләндүрүлидиғанлиқини илгири сүргән.

Уйғур ели даирилири 2017-йили бешида җәнубтики йезиларда қош тил йәсли қурулушини тез сүрәт билән омумлаштуруш үчүн җәнубтики йезиларда йәнә йеңидин 4387 "қош тил" йәслиси қурған иди.

Хитай тили оқутуши асас қилинған бу "қош тиллиқ маарип сиясити" 2000-йилидин башлап уйғур елидә мәҗбурий йолға қоюлған болсиму, даириләр өткән бир нәччә йилдин буян уйғур елидики бу аталмиш "қош тил" маарипиға селинидиған мәбләғни һәссиләп көпәйтип, хитай тили маарипини тез сүрәттә омумлаштурушқа һәрикәт қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт