Uyghur diyaridiki yéngi “Yol bashliqi” belgilimisi diqqet qozghimaqta

Xitay hökümitining Uyghur diyaridiki hül mu'essese qurulushigha ghayet zor meblegh séliwatqanliqi yéqindin buyan köplep melum bolghanidi. “Xitay xewerliri tori” ning 11-awghusttiki xewiride xitay hökümitining bu yil yérim yil ichide Uyghur diyarigha 35 milyard som (texminen besh yérim milyard amérika dolliri) meblegh sélip herqaysi jaylargha tutishidighan tashyollarni yasighanliqi, bu mebleghning bu yil ichide jem'iy 60 milyard somgha yetküzülidighanliqi éytilidu.

Bu heqtiki xewerlerge egiship xitay hökümitining Uyghur diyarida “Yol bashliqi” tüzümini yolgha qoyidighanliqi herqaysi sahening tégishlik diqqitini qozghidi. “Tengritagh” torining 11-awghusttiki xewiride éytilishiche, xitay da'iriliri Uyghur diyaridiki herqaysi tashyol sistémisigha qarita “Yol bashliqi” belgilesh tüzümini élan qilghan bolup, 2022-yilining axirigha qeder herqaysi nahiye we yézilar otturisidiki pütkül tashyol böleklirige “Yol bashliqi” belgilinidighanliqi éytilidu. Xewerdin melum bolushiche, nahiye we yéza derijilik yollargha shu derijidiki qatnash idarilirining mes'ulliri “Yol bashliqi” qilip teyinlinidiken. Buninggha mas halda herqaysi jaylarda yene tarmaq “Yol bashliqi” tesis qilinidiken. Xewerde bu tedbirning tashyollarning jiddiy ehwallarda rawan bolushi hemde bixeterlik mesililiri üchün yolgha qoyulghanliqi éytilidu.

Xitay hökümitining Uyghur diyaridiki qatmu-qat kontrolluq we nazaret méxanizmi izchil herqaysi sahening tenqid obyékti bolup kelgenidi. Nöwettiki bu yéngi tüzümningmu ene shu xildiki Uyghurlarni téximu qattiq kontrol qilish charilirining biri ikenliki algha sürülmekte. Uyghur kishilik hoquq qurulushi teshkilatining xadimliridin luyiza gréw bu heqte radiyomizning ziyaritini qobul qilghanda “Xitay hökümiti hazir Uyghurlarni kontrol qilishta ularning tughulushidin tartip ösüp chong bolush we depne qilinishighiche bolghan barliq halqilarni toluq kontrol qilip boldi” dégenidi.