«Хитайниң дигитал гулаги ичидә» намлиқ һөҗҗәтлик филим уйғур елидә йошурун сүрәткә елинған

Мухбиримиз ирадә
2019-07-12
Елхәт
Пикир
Share
Принт

Уйғур елидики юқири техникилиқ назарәт системиси вә лагерларға аит әмәлийәтләр тохтимай ашкариланмақта. «Малийә вақти» гезитиниң хәвәр қилишичә, йеқинда код исми ли болған бир филим ишлигүчи содигәр қияпитидә уйғур елигә берип райондики юқири бесимлиқ вәзийәтни йошурун сүрәткә алғандин кейин, «хитайниң дигитал гулаги ичидә» мавзулуқ бир һөҗҗәтлик филим ишлигән.

Мәзкур филимда, 2017-йилидин бери уйғур елидә шәкилләнгән лагер вә назарәт системилири һәққидә мәлуматлар берилгәникән. Униңда, 2017-йилидин бери уйғур җәмийитиниң һәр қатлам, һәр саһәсигә тәвә болған милйонларчә кишиниң ғайиб болғанлиқи, лагерға қамалмай қалған уйғурларниңму ишиклири алдиға орнитилған санлиқ мәлумат коди вә санақсиз камералар вә тәкшүрүш понкитлири арқилиқ қаттиқ контрол қилинидиғанлиқи, өйлиригә хитай кадир орунлаштурулидиғанлиқи вә һәрбир кишиниң «нормал, диққәт қилишқа тегишлик вә хәтәрлик» дегән 3 хил категорийәгә айрилидиғанлиқи баян қилинған.

«Малийә вақти» гезитиниң хәвиридә көрситилишичә, мәзкур филимда мәзкур лагерларниң қандақтур кишиләрни тәрбийәләш вә йетиштүрүш орунлири әмәс, бәлки «уларниң роһини аста-аста өлтүрүшни» мәқсәт қилған орунлар икәнлики баян қилинған.

Филимда йәнә уйғурларни тәтқиқ қилиш билән шуғулланған деррий байлер вә райин там қатарлиқ мутәхәссисләр зиярәт қилинған. Компютер тори бихәтәрлик мутәхәссиси грег волтон болса филимда қилған сөзидә: «инсанларниң хусусий әркинликигә зор тәһдит һесаблинидиған юқири иқтидарлиқ назарәт техникилири нөвәттә уйғурларға тәҗрибә қилинмақта. Улар худди тәҗрибә чашқанлиридәк қоллинилмақта» дегән.

Хәвәрдә, бу һөҗҗәтлик филим ишлигүчиниң уйғурларниң нөвәттики ечинишлиқ һалини сүрәтләп бериш үчүн наһайити зор җасарәт билән районға барғанлиқи алаһидә әскәртилгән.

Пикирләр (0)
Share
Толуқ бәт