"Xitayning digital gulagi ichide" namliq höjjetlik filim Uyghur élide yoshurun süretke élin'ghan

Muxbirimiz irade
2019-07-12
Élxet
Pikir
Share
Print

Uyghur élidiki yuqiri téxnikiliq nazaret sistémisi we lagérlargha a'it emeliyetler toxtimay ashkarilanmaqta. "Maliye waqti" gézitining xewer qilishiche, yéqinda kod ismi li bolghan bir filim ishligüchi sodiger qiyapitide Uyghur élige bérip rayondiki yuqiri bésimliq weziyetni yoshurun süretke alghandin kéyin, "Xitayning digital gulagi ichide" mawzuluq bir höjjetlik filim ishligen.

Mezkur filimda, 2017-yilidin béri Uyghur élide shekillen'gen lagér we nazaret sistémiliri heqqide melumatlar bérilgeniken. Uningda, 2017-yilidin béri Uyghur jem'iyitining her qatlam, her sahesige tewe bolghan milyonlarche kishining ghayib bolghanliqi, lagérgha qamalmay qalghan Uyghurlarningmu ishikliri aldigha ornitilghan sanliq melumat kodi we sanaqsiz kaméralar we tekshürüsh ponkitliri arqiliq qattiq kontrol qilinidighanliqi, öylirige xitay kadir orunlashturulidighanliqi we herbir kishining "Normal, diqqet qilishqa tégishlik we xeterlik" dégen 3 xil katégoriyege ayrilidighanliqi bayan qilin'ghan.

"Maliye waqti" gézitining xewiride körsitilishiche, mezkur filimda mezkur lagérlarning qandaqtur kishilerni terbiyelesh we yétishtürüsh orunliri emes, belki "Ularning rohini asta-asta öltürüshni" meqset qilghan orunlar ikenliki bayan qilin'ghan.

Filimda yene Uyghurlarni tetqiq qilish bilen shughullan'ghan dérriy baylér we rayin tam qatarliq mutexessisler ziyaret qilin'ghan. Kompyutér tori bixeterlik mutexessisi grég wolton bolsa filimda qilghan sözide: "Insanlarning xususiy erkinlikige zor tehdit hésablinidighan yuqiri iqtidarliq nazaret téxnikiliri nöwette Uyghurlargha tejribe qilinmaqta. Ular xuddi tejribe chashqanliridek qollinilmaqta" dégen.

Xewerde, bu höjjetlik filim ishligüchining Uyghurlarning nöwettiki échinishliq halini süretlep bérish üchün nahayiti zor jasaret bilen rayon'gha barghanliqi alahide eskertilgen.

Toluq bet