Хитай һөкүмитиниң уйғурларни йөткәп орунлаштурушни тезлитиватқанлиқи мәлум

Мухбиримиз ирадә
2019-04-08
Елхәт
Пикир
Share
Принт

Уйғур елидә «ишқа орунлаштуруш» намида зор сандики адәм өз җайлиридин йөткиветилмәктә.

Ақсу ахбарат торида елан қилинған бир хәвәрдин мәлум болушичә, пәқәт ақсу вилайитиниң өзидила бу йил киргән 4 айдин буян 14 миңға йеқин адәм оз җайлиридин йөткәп «ишқа орунлаштурулған».

Хәвәрдә баян қилинишичә, бу кишиләр тәшкиллик һалда ичкири өлкиләргә йөткәп ишқа орунлаштуруш, аптоном район тәвәсидә йөткәп ишқа орунлаштуруш, биңтуәнгә йөткәп ишқа орунлаштуруш, вилайәт ичидә әмгәк күчлирини йөткәш қатарлиқ түрләр бойичә өз юрт-маканлиридин йөткәп ишқа орунлаштурулған. Көзәткүчиләр бу хил йөткәп ишқа орунлаштурушниң әмәлийәттә кишиләрни өз юрт-маканлиридин йөткиветиш дәп қаримақта.

«Җуңго хәвәрләр тори» ниң бу һәқтики хәвиридә ейтилишичә, уйғур аптоном район миқяси бойичә бу йилниң биринчи пәслидила ешинча әмгәк күчлирини ишқа орунлаштуруш нами астида йөткәлгәнләрниң адәм сани 526 миң адәм қетимға йетидикән. Бу, алдинқи охшаш пәсилдикидин 14 пирсәнт өрлигән болуп, йөткәш хизмити уйғурлар зич олтурақлашқан җәнубтики 3 вилайәт вә бир областқа қарашлиқ 22 наһийәни асас қилип туруп елип берилған.

Юқиридики бу хәвәрдә йәнә, бу йилниң биринчи пәслидә уйғур район тәвәсидә 430 миң адәм қетимниң «кәспий тәрбийәләш» кә орунлаштурулғанлиқи вә җәнубта 110 миң адәм қетим ишқа орунлашқанлиқи йезилған.

Ешинча әмгәк күчлирини йөткәш сияситидә асаслиқи хитайниң ичкири өлкилиригә йөткәш изчил муһим салмақни игилимәктә.

Чәтәлләрдики көзәткүчиләрниң қаришичә, хитай һөкүмити «йепиқ тәрбийә лагерлирини» «кәспий тәрбийә мәркәзлири» дәп атаватқан бир шараитта юқиридики йөткәп ишқа орунлаштурулғанлар лагерға қамалғанлар вә лагер әтрапидики завутларда ишқа селиниватқанларниму өз ичигә елиши мумкин икән.

Уйғур кишилик һоқуқ тәшкилатлири хитай һөкүмитиниң «йөткәп ишқа орунлаштуруш» намлиқ бу һәрикитини уйғурларни мәқсәтлик һалда тарқақлаштуруш, уйғурлар 70% тин артуқ болған җәнубтики районларниң нопус қатлимини бузуп, бу җайларға техиму көп хитай аһалисини көчүрүп келип орунлаштурушни мәқсәт қилғанлиқини илгири сүрүп кәлмәктә.

Пикирләр (0)
Share
Толуқ бәт