Йүннәндики мусулманларниң намайиши тездин зорайди

Иҗтимаий таратқулардики учурларда көрситилишичә, йеқинда йүннәнниң йүши шәһиридики мәшһур имам ма йүвейни хитай сақчилар қолға алғандин кейин бу вәқә шу әтраптики мусулманларниң наразилиқини қозғиған. Мәлум болушичә улар шәһәрлик һөкүмәт бинаси алдида йиғилип намайиш қилған вә ма ювейниң қоюп берилишини тәләп қилған.

Радийомиз хитайчә бөлүминиң бу һәқтики хәвиригә қариғанда, 12-айниң 15-күни чүштә, хоңта райониниң ниер мәйданиға йеқин җайдики шушяң чуәнчүәншяң ресторанини туюқсизла пуқрачә кийингән зор сандики сақчилар қоршивалған. Нәқ мәйдандики бир қанчә синалғуда көрситилишичә, бир нәччә сақчи ресторандин ма йүвейни елип кәткән.

Радийомизниң хәвиридә ейтилишичә, ма йүвей йүчидики бир мәсчитниң имами болуп, йеқинқи йиллардин буян диний паалийәтләргә болған контроллуқниң күчийишигә әгишип у көп қетим паракәндичиликкә учриған. 15-Декабир күни сиртқа тамақ йегили чиққанда ойлимиған йәрдин қолға елинған. Мәлум болушичә, қолға елиш һәрикити ма йүвейни нишанлапла қалмай, униң бир қисим аилә тавабиатлириму шу күни сақчилар тәрипидин елип кетилгән. Хәвәрләргә қариғанда, 16-декабир сәһәрдин башлап, кунмиң вә йүши әтрапидики җайлардин сәпәрвәр қилинған һәрбий вә сақчи машинилири намайиш райониға кирип, йүчиға тутишидиған ташйолни қамал қилған вә туңганларни сорақ қилған.

Тәйвән дөләт мудапиә вә бихәтәрлик институтиниң муавин тәтқиқатчиси ши җйәнйү бу һәқтә сөз қилип “сүрийә вә пәләстин мәсилилириниң хәлқарадики тәсири хитайға охшимиған дәриҗидә кеңәймәктә. Хитай һөкүмити муқимлиқни сақлаш үчүн диний күчләрни қаттиқ контрол қилиш керәк, дәп қариған болуши мумкин” дегән.

Игилинишичә, бу намайишлар йәнила давамлишиватқан болуп бу вәқә, райондики мусулманлар билән хитай һөкүмити оттурисидики зиддийәтни техиму кәскинләштүрүши мумкин, дәп қаралмақта.