Әнвәр ибраһим шәрқий җәнубий асия дөләтлирини хитайниң кеңәймичиликигә ортақ тақабил турушқа чақирған

Мухбиримиз ирадә
2019-02-12
Елхәт
Пикир
Share
Принт

Малайсияда зор тәсир күчкә игә парламент әзаси вә һазирқи баш министир маһатир моһаммәдниң орун басари дәп қариливатқан әнвәр ибраһим шәрқий җәнубий асия дөләтлирини хитайниң кеңәймичиликигә тақабил туруш үчүн ортақ һәрикәт қилишқа чақирған.

«Бенар хәвәрләр тори» ниң билдүрүшичә, әнвәр ибраһим бу сөзләрни 10-феврал күни америкиниң вирҗинийә шитатида бир тәтқиқат оргининиң йиғиниға қатнашқанда қилған. У сөзидә хитайниң җәнубий деңизда сүний араллар вә һәрбий базиларни қуруш арқилиқ җәнубий деңизда кеңәймичилик қиливатқанлиқини әскәрткән һәм шәрқий җәнубий асия һәмкарлиқи ичидики дөләтләрниң буниңға қарши бирликтә һәрикәт қилишиниң әһмийитини тәкитлигән.

Әнвәр ибраһим вирҗинийә шитатидики бу йиғин давамида қилған сөзидә йәнә малайсия һөкүмитиниң 11 нәпәр уйғурни хитайға қайтурмиғанлиқи һәққидә соралған соалларғиму җаваб бәргән. У сөзидә һөкүмәтниң бу 11 нәпәр уйғурни хитайға қайтурмай түркийәгә йолға селип қойғанлиқини тоғра бир һәрикәт, дәп қарайдиғанлиқини ипадә қилған. У сөзидә: «хитай билән болған мунасивәтлиримиз бизниң соал қоюшимизға, дөләт мәнпәәти үчүнла әмәс бәлки башқа һәрқандақ бир топлуқниң адалити үчүн сөз қилишимизға тосалғу болмаслиқи керәк» дегән.

Малайсия һөкүмити уйғур елидә йолға қоюлуватқан лагер түзүмигә қарита ипадә билдүргән тунҗи мусулман дөлити иди. Әнвәр ибраһим бундин илгири қилған бир сөзидиму хитай һөкүмитини уйғурларниң һәқ-һоқуқлириға һөрмәт қилишқа чақириш билән биргә уйғур елидики лагер мәсилисиниң хитайниң ички иши әмәсликини тәкитлигән иди.

Пикирләр (0)
Share
Толуқ бәт