Enwer ibrahim sherqiy jenubiy asiya döletlirini xitayning kéngeymichilikige ortaq taqabil turushqa chaqirghan

Muxbirimiz irade
2019-02-12
Élxet
Pikir
Share
Print

Malaysiyada zor tesir küchke ige parlamént ezasi we hazirqi bash ministir mahatir mohammedning orun basari dep qariliwatqan enwer ibrahim sherqiy jenubiy asiya döletlirini xitayning kéngeymichilikige taqabil turush üchün ortaq heriket qilishqa chaqirghan.

"Bénar xewerler tori" ning bildürüshiche, enwer ibrahim bu sözlerni 10-féwral küni amérikining wirjiniye shitatida bir tetqiqat orginining yighinigha qatnashqanda qilghan. U sözide xitayning jenubiy déngizda sün'iy arallar we herbiy bazilarni qurush arqiliq jenubiy déngizda kéngeymichilik qiliwatqanliqini eskertken hem sherqiy jenubiy asiya hemkarliqi ichidiki döletlerning buninggha qarshi birlikte heriket qilishining ehmiyitini tekitligen.

Enwer ibrahim wirjiniye shitatidiki bu yighin dawamida qilghan sözide yene malaysiya hökümitining 11 neper Uyghurni xitaygha qayturmighanliqi heqqide soralghan so'allarghimu jawab bergen. U sözide hökümetning bu 11 neper Uyghurni xitaygha qayturmay türkiyege yolgha sélip qoyghanliqini toghra bir heriket, dep qaraydighanliqini ipade qilghan. U sözide: "Xitay bilen bolghan munasiwetlirimiz bizning so'al qoyushimizgha, dölet menpe'eti üchünla emes belki bashqa herqandaq bir topluqning adaliti üchün söz qilishimizgha tosalghu bolmasliqi kérek" dégen.

Malaysiya hökümiti Uyghur élide yolgha qoyuluwatqan lagér tüzümige qarita ipade bildürgen tunji musulman döliti idi. Enwer ibrahim bundin ilgiri qilghan bir sözidimu xitay hökümitini Uyghurlarning heq-hoquqlirigha hörmet qilishqa chaqirish bilen birge Uyghur élidiki lagér mesilisining xitayning ichki ishi emeslikini tekitligen idi.

Toluq bet