Yéngi zélandiye xewpsizlik we istixbarat idarisi xitayning murekkep jasusluq heriketlirini eyibligen

• Washin'gtondin muxbirimiz irade teyyarlidi
  2024-09-05

Yéngi zélandiye xewpsizlik we istixbarat idarisi (NZSIS) yilliq doklatida xitayning “Murekkep jasusluq” qilmishliri heqqidiki endishisini alahide tilgha alghan.

“Amérika awazi” radiyosining xewer qilishiche, yéngi zélandiye xewpsizlik we istixbarat idarisi 3-séntebir küni jasusluq tehditi heqqidiki yilliq doklatini élan qilip, “Xitayning intayin murekkep, aldamchiliq taktikisi” heqqidiki endishilirini otturigha qoyghan. Bolupmu ular xitayning bu arqiliq yéngi zélandiyening ichki ishlirigha qol tiqiwatqanliqini nuqtiliq gewdilendürgen.

Ular doklatida, béyjingning yéngi zélandiyede bir qisim teshkilatlar arqiliq yerlik guruppilargha singip kirip, jama'et pikrini xitay kompartiyesige mayil terepke özgertiwatqanliqini bildürgen. Buningdiki bir körünerlik bir misal yéngi zélandiyediki xitayche axbarat organliri iken.

Doklatta munular déyilgen: “Bu xil organlar qarimaqqa xususiy, puqrawi orunlardek qilsimu, emeliyette ularning heqiqiy teweliki, yönilishi we meblegh menbesi yoshurun” .

 “Amérika awazi” ning déyishiche, mezkur doklatta xitayning ismining ochuq-ashkara tilgha élinip tenqid qilinishi, yéngi zélandiyening tashqi siyasitidiki burulushni eks ettüridiken. Yéqinda saylinip chiqqan mötidil ong qanat hökümet yéngi zélandiyening gherbtiki en'eniwi ittipaqdashliri bilen bolghan alaqisini qaytidin kücheytidighanliqini bildürgen iken.

Amérika hökümitimu yéqindin buyan xitayning amérikadiki jasusluq pa'aliyetliri we singip kirish heriketlirige zerbe bérishni kücheytmekte. Bolupmu 3-séntebir küni nyu-york ishtatining sabiq bashliqi andiri kumo (Andrew Cuomo) we nöwettiki ishtat bashliqi ketiy xokul (Kathy Hochul) ning qol astida muhim wezipilerni ötigen linda sun isimlik xitay ayalning jasus gumandari bolup tutulushi, xitay hökümitining singip kirish herikitining yarqin misali bolup qalghan idi.

Amérika dölet mejlisi qarmiqidiki “Xitay ishliri pewqul'adde komitéti” ning re'isi jon mullinir bu heqte “Dölet xewerliri” téléwiziyesige qilghan sözide, “Xitayning yuqiri derijilik ishtat we dölet organlirigha singip kirishi kishini chöchütidu. Biz xitay hökümitining dölitimiz ichidiki jasusluq pa'aliyetlirige qattiq diqqet qilishimiz kérek” dep eskertken.