Uyghur aptonom rayonluq hökümetning bayanatchisi "Adriyan zénzgha qanuniy heriket qollinimiz" dep tehdit salghan

Muxbirimiz irade
2021-12-02
Share

Tonulghan tetqiqatchi adriyan zénz yéqinda Uyghur élida yürgüzülüwatqan lagér we mejburiy emgek qatarliq insan qélipidin chiqqan jinayetlerning xitay dölet re'isi shi jinpingning biwaste yolyoruqi bilen ijra qilin'ghanliqini ispatlap chiqqan idi.

U "Uyghur sot kollégiyesi" ge namelum bir shexs teripidin ewetip bérilgen xitayning "Mutleq mexpiy" höjjetlirini tetqiq qilish asasida yuqiriqi yekünni chiqarghan. Netijide Uyghurlargha qaritiliwatqan irqiy qirghinchiliqning xitay merkizi hökümitining biwaste pilanlishi we yétekchilikide élip bériliwatqan uzun muddetlik bir siyasiy istratégiye ikenliki yenimu aydingliship, zor ghulghula qozghighan.

Uyghur aptonom rayonluq hökümet 1-dékabir küni derhal bir axbarat yighini échip, adriyan zénzni qattiq eyibligen. Uyghur aptonom rayonluq hökümetning bayanatchisi shü güyshyang sözide: "Xitaygha düshmenliki bilen tonulghan adriyan zénz ochuq-ashkara yalghanchiliq qildi, munasiwetlik tarmaqlirimiz bu saxta alimgha qarita qanuniy heriket qollinidu," dégen.

Adriyan zénz xitayning "Yer shari waqti" géziti qatarliq taratqulirida özige qarshi élan qiliniwatqan yuqiriqidek hujumlargha jawaben: "Bu munasiwetlik tarmaqlarning kimlikige qiziqiwatimen," dégen.

Diqqet qozghaydighini shuki, xitayning "Yer shari waqti" géziti arqidinla xitayning dölet igilikidiki xitay éléktron shirkiti (CEC) ning 1-dékabir küni béyjingda yéngi bir xil uchur yollash we ishxana supisi epini yasap chiqqanliqini, "Lenshin" namliq bu epning hökümet organliri we dölet karxanilirini bixeter tor xizmet supisi bilen teminlep, mexpiy uchurlarning ashkarilinip kétishining aldini alidighanliqini xewer qilghan.

Közetküchiler buni xitayning yuqiri derijilik orge'anliri chiqarghan "Mutleq mexpiy" höjjetlirining xelq'aragha ashkarilinip kétishidin kéyin élin'ghan bir tedbir bolushi mumkin, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet