Җаң хәйтавниң аяли оғли билән америкиға қечип кәлди

Радиомиз кантончә бөлүминиң хәвиридә ейтилишичә, үрүмчи оттура хәлқ сот мәһкимиси 19 йиллиқ қамаққа һөкүм қилған хитай адвокат җаң хәйтавниң аяли оғли билән бирликтә 23-декабир тайланд арқилиқ америкиға қечип кәлгән.

Мәлум болушичә хитай адвокат җаң хәйтав хитай һөкүмитиниң уйғурларға қаратқан миллий сиясәтлирини әйибләп үндидарда 69 парчә язма йоллиғанлиқи үчүн 2016-йили январда “дөләтни ағдурушқа қутратқулуқ қилған” вә “чәтәлгә җасуслуқ қилған” дәп әйибләнгән. Шуниңдин кейин җаң хәйтавниң аяли ли әйҗе изчил хитай һөкүмитиниң аварә қилишиға учрап кәлгән.

Хәвәрдә ейтилишичә, америкидики христиан тәшкилатлири изчил җаң хәйтавниң әһвалиға көңүл бөлүп кәлгән һәмдә ички қисимда өзара маслишиш арқилиқ или әйҗени аввал мәхпий йосунда тайландқа чиқиривәткән, андин тайландин америкиға елип кәлгән. Мәзкур қутқузуш хизмитигә иштирак қилғучиларниң бири, америкидики “хитайға ярдәм” фондиниң қурғучиси боб фу бу һәқтә сөз қилип, “америка һөкүмити вә униң һәрқайси җайлардики әлчиханилириға чәксиз тәшәккүр билдүримиз. Бизниңчә бу ли әйҗе вә униң икки яшлиқ оғли үчүн әң чоң рождество совғиси болди,” дегән.