Җаң чүншән “вәтәнпәрвәр диний затлар” қошуни күчәйтишни тәкитлиди

24 - Феврал күни үрүмчидә өткүзүлгән 2015 - йиллиқ кадирларни төвәндики йеза - қишлақларға әвәтип тәшвиқат - тәрғибат қилиш хизмәтлирини хуласилаш вә мукапатлаш йиғинида сөз қилған уйғур аптоном районлуқ партком секритари җаң чүншән 2015 - йиллиқ “үч әл” паалийәтлиригә юқири баһа бериш билән биргә 2016 - йили елип баридиған мәзкур паалийәтниң бир қатар муһим нишанлирини тәкитлигәндә “әсәбийликкә зәрбә бериш вә муқимлиқни зор күч билән қоғдаш”ни тәкитлигән.

Тәңритағ ториниң хәвиридин мәлум болушичә, җаң чүншән сөзидә дини ишлар җәһәттики башқурушни күчәйтишни тәкитләп, “диний ишларни яхши башқуруп, дин билән сотсиялистик җәмийәтниң өзара маслишишиға актип йетәкчилик қилиш” ни көрсәткән.

У йәнә 2016 - йиллиқ хизмәтләрниң нишани сүпитидә “бәштә яхши диний зат” паалийитини давамлиқ чоңқур илгири сүрүшни, “вәтәнпәрвәр диний затлар қошуни қурулушини күчәйтиш”ни тәкитлигән.

Муқимлиқни қоғдашниң муһимлиқини алаһидә тәкитлигән җаң чүншән “муқимлиқни қоғдаш хизмитини яхши әмәлийләштүрүп, актип һуҗум қилишта чиң туруп, қаттиқ зәрбә бериштәк юқири бесимлиқ һаләтни изчил сақлаш” дәп көрсәткән .

2014 - Йили башланған кадирларни йеза - қишлақларға әвәтип, тәшвиқат - тәрғибат қилиш һәрикитигә хитай һөкүмити тәрипидин “үч әл”паалийити, йәни “әл райини билиш, әлгә нәп йәткүзүш, әлни майил қилиш” дәп нам берилгән.

Хәвәрдә әскәртилишичә, 2015 - йили, уйғур аптоном районлуқ һөкүмәт, ишләп чиқириш қурулуш армийиси, вә хитай армийәсиң уйғур районида турушлуқ қисимлири 10 миңдин артуқ хизмәт әтрити тәшкилләп, хизмәткә әвәткән.