Zika wirusining amérikida partlash xaraktérlik yamrap kételmeydighanliqini bildürüldi

Muxbirimiz jüme
2016-01-30
Share

Amérikida zika wirusi bilen yuqumlan'ghan 31 adem bayqalghan bolsimu, amérika sehiye xadimliri peyshenbe küni mezkur wirusning amérikida partlash xaraktérlik yamrap kételmeydighanliqini bildürdi.

"Bügünki amérika" gézitining neqil qilishiche, amérika yuqumluq késelliklerning aldini élish merkizining mu'awin diréktori anné shuchat, nöwette amérikida yuqumlan'ghan kishiler amérika paytexti washin'gton alahide rayoni qatarliq 11 shtatqa tarqalghan bolsimu, yuqumdarlarning hemmisi mezkur wirusni yuqum rayonlirida sayahet qilish jeryanida yuqturuwalghanliqini bildürgen.

Zika wirusi bundin 70 yil burun uganda zika ormanliqidiki maymunlarda bayqalghan bolghachqa "Zika wirusi" dep atalghan.

Zika wirusini edis pashisi yeni qara pasha élip yüridighan bolup, mezkur pashilar asasen tropik we subtropik belwaghlarda yashaydiken.

Mezkur wirus bu qétim jenubiy amérikidiki biraziliyeni merkez qilghandin bashqa dunyadiki köpinche döletlerde bayqalghan.

Biraziliye alimliri zika wirusining bowaqlarning eyibnaq tughulushigha seweb bolidighanliqi, uning bowaqlarning nérwa sistémisi we méngiside kemtüklük peyda qilidighanliqini bayqighan.

Biraziliye prézidénti dilma rosséf jüme kündiki bayanatida nöwette biraziliyede zika wirusini élip yüridighan pashilarni keng kölemlik tazilash herikiti bashlan'ghanliqini uqturdi.

"Bügünki amérika" gézitining neqil élip körsitishiche yene, qara pasha amérikining issiqraq jaylirida mewjut bolsimu, chet'ellerde zika wirusini yuqturuwalghan ayrim shexslerning mezkur wirusini amérikida tarqitishi intayin qéyin iken.

Bu heqte toxtalghan atlanta emory instituti muhit tetqiqati fakultéti dotsénti gonzalo wazku'ez zika wirusining yuqumlinip qisqa waqit ichide yuqumlan'ghan kishini chaqqan pashigha yuqidighanliqi, emma mezkur wirusining bir hepte ichide qandin tazilinip kétidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet