“Zimistan” tori ichkirige yötkelgen Uyghur tutqunlar heqqide téximu köp melumatlarni ashkarilidi

Xitay hökümitining Uyghur diyaridiki lagérlar mesilisini xelq'aradin yoshurush üchün Uyghur tutqunlarni zor sanda ichkirige yötkigenliki heqqide oxshash bolmighan uchurlar we xewerler melum bolghan idi. Yéqinda ichkirige yötkelgen Uyghur tutqunlarning hazirqi ehwali heqqide bir qisim yéngi melumatlar otturigha chiqti.

“Zimistan” torining 3-yanwardiki xewiride éytilishiche, nöwette shenshi ölkisining tongchu'en shehiridiki süyjyago türmisige üch ming Uyghur tutqun yötkelgen. Alaqidar xadimlarning bildürüshiche, bu tutqunlar awwal pütünley yépiq haldiki poyiz bilen bilen awwal shi'en shehirige, andin herbiy yük mashinisida süyjyago türmisige toshulghan. Xewer bilen teminligüchi bu heqte söz qilip “Bular pütünley kéchisi yötkeldi. Türmidikilerge bu mehbuslargha munasiwetlik herqandaq uchurning ‛dölet mexpiyiti‚ ikenliki uqturuldi,” dégen.

Yene bir türküm Uyghur tutqunlar 2018-yili 22-awghusttin 24-awghustqiche gensuning jyuchu'en shehirige yötkelgen. Yerlik ahalining bildürüshiche, shu waqitlarda poyiz istansisidin jyuchu'en shehiride yéngidin sélin'ghan bir türmigiche bolghan pütün yollar qamal qilin'ghan, poyiz istansisi etrapidiki dukandarlarning bu waqitta dukan échishi, hetta öyliridin sirtqa qarishimu men'i qilin'ghan. Yerlik bir kishi bu heqte melumat bérip, “Az dégendimu 30-40 aptobusta Uyghur mehbuslarni toshudi. Aptobuslarning hemmisi perdisi chüshürülgen halette bolup, udul wogzaldinla ularni toshup ketti” dégen.

Yéngi türmige yötkelgen Uyghur mehbuslar heqqide melumat bergüchi bu tutqunlarning qattiq nazaret qilinidighanliqini, ular hajet qilidighan jayghimu közitish kamérasi ornitilghanliqini, tutqunlargha künige bir waqla tamaq bérilidighanliqini éytip “Ular héchqachan özliri qamalghan kamérlardin sirtqa chiqirilmaydu. Ular mushu kamérdin chiqmayla tügiship kétidu” deydu.