“Zimistan” tori Uyghur élidiki bixeterlik tedbirliri heqqide bezi uchurlarni ashkarilidi

“Zimistan” tori Uyghur élining melum bir shehiridin tartilghan süretler asasida Uyghurlar uchrawatqan kemsitishni we rayondiki chékidin ashqan bixeterlik tedbirlirini pash qildi.

“Zimistan” torining 5-féwral küni tarqatqan xewiridin qarighanda Uyghurlarning hemmisi da'iriler teripidin xuddi “Térrorchi” lardek mu'amilige uchrimaqtiken. Xitay hökümiti her qedemde Uyghurlarning semige ularni bir “Tehdit”, dep qaraydighanliqini sélip turidiken.

Xewerdiki sürette körsitilishiche, yerlik da'iriler hazir jaylardiki ottura we chong kölemlik talla bazarlirining pul töleydighan orunlirining etrapini pütünley tömür réshatka bilen oriwétishni buyruq qilghan bolup, bu ularning atalmish “Térrorluqtin” saqlinish tedbirlirining biri iken.

Buningdin sirt yene, talla bazarlar hemmisi choqum dukinida kaltek-toqmaq, qalqan, pichaqtin qoghdaydighan kiyim dégendek “Térrorluqtin saqlinish esliheliri” ni saqlishi we shundaqla jiddiy ehwallarda birla kunupkini bassa signal béridighan téléfon ornitishi kérek iken.

Bir dukan xojayini muxbirgha bu téléfonlarni ishlitish pursiti bolup baqmighachqa topa bésip ketkenlikini, bu téléfonni ornitishning mejburiy ikenlikini, dukinida yuqiridiki eswablar bolmighanlarning dukini taqilip, dukan igilirining “Terbiye” ge ewetilidighanliqini éytqan.

Melum bolushiche, xitay da'iriliri yene, jaylarda öy ijarige élip olturidighan Uyghurlardin bek qattiq éhtiyat qilidiken. Shunga herqandaq ijarige bérilidighan öyge nazaret kamérasi ornitish shert iken. “Zimistan” torining xewiride Uyghur élidiki nahayiti addiy ijare öylerning özige qilchimu maslashmaydighan ésil “Tömür bixeterlik ishikliri” ornatqanliqi, da'irilerning ahalilerni ijare öylerge bundaq ishiklerni ornitishqa mejburlaydighanliqi we ornatmighanlarning oxshashla “Terbiye” ge ewetilidighanliqi tilgha élin'ghan.