“зимистан” тори хитай өлкилиридә хизмәт қилидиған уйғурларниңму охшашла қаттиқ назарәт қилиниватқанлиқини билдүрди

Хитай һөкүмитиниң ичкири өлкиләрдә ишләватқан вә мәктәпләрдә оқуватқан уйғурларниму уйғур елидикигә охшашла қаттиқ тәқиб қиливатқанлиқи мәлум.

“зимистан” тори 7-феврал күни тарқатқан бир хәвиридә хитай өлкилиридә ишләйдиған уйғурларниңму давамлиқ һалда сорақ қилинип, телефонлириниң тәкшүрүлүп туридиғанлиқини билдүргән.

Хәвәрдә ейтилишичә, хитай өлкилиридә ишләйдиған уйғурлар ичкиригә бериштин аввал йәрлик сақчи даирилиригә өзлириниң әһвалини тәпсилий мәлум қилип, уларниң рухситини елиши керәк болса, ичкири өлкиләргә кәлгәндин кейинму давамлиқ улар билән алақә қилип туруши керәк икән. Уйғур районлуқ һөкүмәт даирилири уларға һәптидә бир қетим халиған вақитта телефон қилип әһвалини игиләп туридикән.

Шәнши өлкисидә ишләйдиған бир уйғур қизниң “зимистан” ториға ейтип беришичә, әгәр улар бу телефонға үч қетим җаваб бәрмәй қалса, сақчилар дәрһал келип уларни қолға алидикән вә юртиға қайтуруветидикән. Шуңа улар һәммиси телефонлирини бир йәрләрдә унтуп қелиштин бәк әнсирәйдикән.

Хәвәрдә йәнә ичкиридики бир университетта оқуйдиған бир уйғур оқуғучиниң синиптики хитай савақдашлири билән саяһәткә чиққанда уйғур болғанлиқи үчүнла сәпәр җәрянида нурғун соал-сораққа дуч кәлгәнлики, бу әһвалдин униң хитай савақдашлириниңму қаттиқ һәйран болғанлиқи баян қилинған.