“Zimistan” tori xitay ölkiliride xizmet qilidighan Uyghurlarningmu oxshashla qattiq nazaret qiliniwatqanliqini bildürdi

Xitay hökümitining ichkiri ölkilerde ishlewatqan we mekteplerde oquwatqan Uyghurlarnimu Uyghur élidikige oxshashla qattiq teqib qiliwatqanliqi melum.

“Zimistan” tori 7-féwral küni tarqatqan bir xewiride xitay ölkiliride ishleydighan Uyghurlarningmu dawamliq halda soraq qilinip, téléfonlirining tekshürülüp turidighanliqini bildürgen.

Xewerde éytilishiche, xitay ölkiliride ishleydighan Uyghurlar ichkirige bérishtin awwal yerlik saqchi da'irilirige özlirining ehwalini tepsiliy melum qilip, ularning ruxsitini élishi kérek bolsa, ichkiri ölkilerge kelgendin kéyinmu dawamliq ular bilen alaqe qilip turushi kérek iken. Uyghur rayonluq hökümet da'iriliri ulargha heptide bir qétim xalighan waqitta téléfon qilip ehwalini igilep turidiken.

Shenshi ölkiside ishleydighan bir Uyghur qizning “Zimistan” torigha éytip bérishiche, eger ular bu téléfon'gha üch qétim jawab bermey qalsa, saqchilar derhal kélip ularni qolgha alidiken we yurtigha qayturuwétidiken. Shunga ular hemmisi téléfonlirini bir yerlerde untup qélishtin bek ensireydiken.

Xewerde yene ichkiridiki bir uniwérsitétta oquydighan bir Uyghur oqughuchining siniptiki xitay sawaqdashliri bilen sayahetke chiqqanda Uyghur bolghanliqi üchünla seper jeryanida nurghun so'al-soraqqa duch kelgenliki, bu ehwaldin uning xitay sawaqdashliriningmu qattiq heyran bolghanliqi bayan qilin'ghan.