«Зимистан» тори хитай өлкилиридә уйғурларниң назарәт қилиш нишани болуватқанлиқини хәвәр қилди

Мухбиримиз ирадә
2019-04-08
Елхәт
Пикир
Share
Принт

«Зимистан» тори 8-апрел күнидики хәвиридә баян қилишичә, улар йеқинда хенән өлкилик җамаәт хәвпсизлик идарисиниң «икки қурултай» роһини өгиниш йиғинида террорлуққа қарши туруш һәққидә қилинған музакирә пиланиниң мәзмуниға еришкән.

Пиланда көрситилишичә, униңда һәрқандақ бир кишиниң уйғур миллитидин болған бирини байқап қалса, уни дәрһал «террорлуққа қарши туруш» ишханисиға хәвәр қилиши вә уйғурларни назарәт қилиш хизмәтлирини яхши орунлаштуруш йолйоруқи берилгән.

Пиландин йәнә, уйғурларниң паалийәт-һәрикәтлири һәққидә учур топлаш, уларниң пулини нәгә ишлитиватқанлиқи, немә сетивалғанлиқи, тор алақилири, дини паалийәтлири вә униң мәзмунлириниң ениқ болуши дегәнләрму орун алған икән.

Бундин башқа йәнә, фуяң шәһиридики меһманханилар вә торханиларғиму уйғурларни көрсә мәлум қилиш һәққидики уқтурушлар чүшүрүлгән болуп, хилаплиқ қилғанларниң «террорлуққа қарши туруш қануни» бойичә җазалинидиғанлиқи агаһландурулған.

«Зимистан» тори йәнә хебей өлкилик партком тәрипидин елан қилинған юқиридикигә охшаш уқтурушни көргән болуп, униңда уйғурлар «хәтәрлик унсурлар» дәп көрситилгән.

Хитай һөкүмитиниң пүткүл бир милләтни «террорлуқ» «радикаллиқ» нами билән қарилап, 800 миңдин 2 милйонғичә кишини лагерға қамиғанлиқи дуняда қаттиқ наразилиқ пәйда қиливатқан бир пәйттә өзиниң «йәршари вақти гезити» гә охшаш һөкүмәт мәтбуатида уйғур елиниң чечәк пәслидә саяһәтчи җәлп қилип, йәрликләргә наһайити зор кирим мәнбәси яратқанлиқиниму хәвәр қилған.

Пикирләр (0)
Share
Толуқ бәт